Ridder ákiminiń orynbasary 19 jastaǵy jigitti qaǵyp óltirgen kezde kólik salonynda Óskemen ákimi de otyrǵan. Bul aqparatty ShQO prokýratýrasy búgin resmi túrde rastady, dep jazdy sputniknews.kz Ýstinka LIVE-q silteme jasap.
Eske salyp ótsek, buǵan deiin Óskemen ákiminiń baspasóz hatshysy Áset Qairatbek oblys ortalyǵynyń basshysy Qýat Tumabaevtyń qaiǵyly jol apatyna kezdeisoq kýá bolǵanyn aitqan edi. Alaida ShQO prokýratýrasy Tumabaevtyń mas júrgizýshiniń qasynda otyrǵanyn málimdedi.
Qadaǵalaý vedomstvosynan habarlaǵandai, 19 sáýirde Ridder qalasynyń prokýratýrasyna marqumnyń ákesi aryzdanyp, apatqa kináli júrgizýshini ustaýǵa der kezinde shara qabyldamaǵany úshin IIB qyzmetkerlerin jaýapqa tartýdy suraǵan.
Dál sol kúni qalalyq prokýratýraǵa qaza tapqan jigittiń ákesiniń dosy Ridder IIB kriminaldy politsiia bóliminiń bastyǵy qysym men qoqan-loqqy kórsetip jatqanyn aityp shaǵymdanǵan.
"Atalǵan faktilerge qatysty oblystyq IID Ózindik qaýipsizdik basqarmasy QK 370-baby (qyzmettegi áreketsizdik) jáne 362-baby 4-tarmaǵy (kúsh qoldanyp, laýazymdyq ókilettikterdi asyra paidalaný) boiynsha sotqa deiingi tergeý júrgizip jatyr", — delingen ShQO prokýratýrasy baspasóz qyzmetiniń resmi habarlamasynda.
Qylmystyq isterdi tergeý qadaǵalaý vedomstvosynyń baqylaýynda. Ridder ákiminiń orynbasary Baýyrjan Qurmanbaevqa qatysty kepil engizý quqyǵynsyz qamaýda ustaý túrinde bultartpaý sharasy tańdaldy.
Qazirgi tańda ol ýaqytsha ustaý izoliatorynda jatyr. Óskemen ákimdigi ázirge atalǵan jaǵdaiǵa qatysty túsinikteme bergen joq. Keshe qalalyq ákimdik baspasóz máslihatyn ótkizbek boldy, alaida sońǵy sátte jospar buzyldy.
Tergeý múddesine bailanysty basqa aqparat jariia etilmei otyr.
