Foto: QR ǴJBM
QR Ǵylym jáne joǵary bilim ministri Saiasat Nurbek Qazaq sport jáne týrizm akademiiasynyń stýdenti Sherhan Qalmurzamen júzdesti, dep habarlaidy Ult.kz.
Kezdesý barysynda ministr buqaralyq sportty damytýdyń mańyzdylyǵyna toqtalyp, sondai-aq joǵary bilimniń bolashaq urpaqty qalyptastyrýda sheshýshi ról atqaratynyn erekshe atap ótti.
«Memleket basshysy buqaralyq sporttyń damýyna airyqsha mán beredi. Prezident óz sózinde: «Balalardyń amandyǵy, olardyń densaýlyǵy jáne sapaly bilim alýy – elimizdiń keleshegine tikelei qatysy bar másele», – degen edi. Osy baǵytta biz de jastardy jan-jaqty qoldap, olardyń áleýetin ashýǵa jáne elimizdiń halyqaralyq deńgeidegi bedelin arttyrýǵa jaǵdai jasap kelemiz. Sondai-aq barlyq sportshylar halyqaralyq standarttarǵa sai sapaly bilim alýy qajet ekenin atap ótkim keledi. Bul olarǵa sporttaǵy joǵary jetistikterge ǵana emes, sonymen qatar sporttyq mansabyn aiaqtaǵannan keiin de túrli salalarda qalyptasýǵa múmkindik beredi. Jas qaqpashynyń kórsetken tarihi nátijesi – búkil qazaqstandyq jastar úshin jarqyn úlgi. Ony osy jetistigimen quttyqtaimyn jáne aldaǵy oiyndarda sáttilik tileimin!» – dedi Saiasat Nurbek.
Sondai-aq búginde talantty jastardyń jańa býynyn qalyptastyrýǵa berik negiz qalanǵany atap ótildi. Jastarǵa úlgi kórsetý maqsatynda aqyly bólimde bilim alyp júrgen Sherhan Qalmurzaǵa rektordyń bilim berý granty tabystaldy. Sonymen qatar aldaǵy ýaqytta da daryndy jastarǵa airyqsha kóńil bólinetini jetkizildi.
Qazaq sport jáne týrizm akademiiasynyń sport jáne tárbie jumysy jónindegi prorektory Muhtar Esqaliev oqý orny jasóspirimder men stýdentterdiń bastamalaryn árdaiym qoldaitynyn aitty. Óz kezeginde stýdent-sportshy kórsetilgen iltipat úshin rizashylyǵyn bildirip, Qazaqstandaǵy fýtboldyń damýyna úles qosýǵa nietti ekenin jetkizdi.
