Oqyrmandarmen kezdesý barysynda jii estitin suraqtarymnyń biri: «Qazirgi zamandas aqyndardan kimdi oqisyz?» Basynda bir túrli yńǵaisyzdanyp qysylýshy edim, biraq keiinirek «eshkimdi» dep jaýap beretin boldym. Ashy bolsa da, shyndyq. Men bul úshin uialmaimyn.
Úlkenderdi aityp otyrǵan joqpyn, qansha degenmen bolmysy basqa kezeńde qalyptasty, biraq jas aqyndar qai zamanda ómir súrip jatqanymen sanasqany durys. Birneshe ret sheneýnikterdiń qatysýymen ótken jas aqyndardyń jiynynda bolǵanym bar. Sonda táýelsizdik jyldary qalyptasqan, táýelsizdigimizben qatarlas óleń sheberleriniń sózderi men oilaýy sovet kezinde ósip-jetilgen aqyndardan asa almai jatqanyn ańǵardym. Shendilerge adamdardyń poeziiany oqymai ketkenin aitady, óleńderin basýǵa qarajat suraidy. Qoiý kerek qoi.
Al jaraidy, memleket qoldaýymen basylǵan eken. Sheneýnik qoldasa, taǵy bir tirajdy kórip máz bolarsyń. Biraq shyǵarmashylyǵyńnyń basty maqsaty qandai? Óleńderińdi kitap qylyp shyǵaryp, týystaryńa taratyp maqtaný ma álde poeziiańnyń oqyrmannyń júregine jetkeni me? Ol kitaptardyń basylyp shyqqanyn kim bilip jatyr?
Bizde aqyn kóp. Óleń jazbaityn qazaqty kezdestirmegen shyǵarmyn áli. Nege aqyndarymyzdyń jas býyny bir-birimen básekelestikke túspeidi? Nege shyǵarmalary básekelestikten top jaryp, oqyrmanǵa jol tartpaidy? Men tutynýshylyq zamanda ómir súrip jatqan adammyn. Qalasam da, qalamasam da, tutynýshylyq bolmys meniń sanamdy bileidi, basqa amalym joq. Qarapaiym tilmen aitsam, pitstsa jegim kelse, kepteliste turyp, itim shyǵyp, ony qai jerde satyp alsam bolady dep júgirmeimin. Internetke kiremin de, ónimin úiime jiyrma minýtta jetkizip berýge daiyn bes-alty kásipkerdiń usynysyn op-ońai taýyp alamyn. Soǵan jaman úirene bastaimyn, solai sanam qalyptasady. Óleń de – taýar. Sheneýniktiń qoldap, kitabyńdy shyǵaryp bergeni shyǵarmańa artyqshylyq qospaidy, poeziiańa bereke bermeidi. Sen surap bardyń, qaita betiń qalyń eken, al bir uialshaq aqyn ondaiǵa bara almaidy. Sonda onyń poeziiasy oqýǵa laiyqsyz degen sóz be? Laiyqty sanasań – dálelde. Shyǵarmashylyǵyń ómir súrsin deseń - óziń júgir. Qazir tapsyrys bergen kitabyńdy tez jetkizip beretin birneshe onlain-qyzmet bar. Sen solarmen kelistiń be? Basqasyn aitpaǵanda, jinaǵyńa sol jerde tapsyrys berýge bola ma? Áli júrsiń be? Onda oilan. Poeziiań oqyrman túgil ózińe kerek emes siiaqty ǵoi.
Intelligentsiiamyz, jas aqyn, jazýshylarymyz masyldyq sanadan arylýy kerek. Áitpese mádenietimiz órge júzbeidi jáne jańǵyrýymyz ekitalai.
P.S. Osynda sýrettegen aqynymnyń idealyna uqsap kele jatqan sheber bolsa, ol, sirá, Maqpal Jumabai shyǵar.
Baqytjan Buqarbaidyń feisbýktaǵy jazbasynan
