540 myńǵa jýyq qazaqstandyqqa tabysynan aiyrylýyna bailanysty 42500 teńge kóleminde áleýmettik tólem taǵaiyndaldy, dep habarlaidy "Ult aqparat".
QR Eńbek jáne halyqty áleýmettik qorǵaý ministrliginiń málimetine sáikes, 9 sáýir saǵat 23.00-degi jaǵdai boiynsha, elde tótenshe jaǵdaidyń engizilýine bailanysty 42500 teńge járdemaqyny alý úshin 1 mln 782 myń 632 azamattan barlyǵy 3 mln 396 myń 018 ótinish kelip túsken. Osylaisha, 1 mln 613 myń 386 ótinish eki qaitara jiberilgen. Osy rette, ministrlik kelip túsetin málimetterdi qaraý merzimin qysqartý úshin ótinishti bir ret qana joldaýdy suraidy.
Osy ýaqytqa deiin Memlekettik áleýmettik saqtandyrý qorynan 42500 teńge kólemindegi áleýmettik tólem barlyǵy 538 983 adamǵa taǵaiyndalǵan.
«Derekterdi tekserý jáne ótinishti qaraý merzimi 3 jumys kúnin quraidy. MÁSQ-ta tólem jasaý týraly sheshim qabyldanǵannan keiin ótinish berýshige SMS-habarlama keledi. Keiinnen ótinish berýshiniń derekteri «Azamattarǵa arnalǵan úkimet» memlekettik korporatsiiasy» KEAQ-ǵa jiberiledi, ol ony ekinshi deńgeidegi bankterge tólem júrgizý úshin jiberedi. Áleýmettik tólem alýǵa ótinimdi eGov portaly, 42500.enbek.kz veb-saity jáne https://t.me/Help42500Bot adresi boiynsha Telegram-bot arqyly berýge bolady», - dedi vedomstvodan.
Eske salaiyq, 42 500 teńge mólsherindegi áleýmettik tólem kelesi sanattarǵa beriledi:
– shaǵyn jáne orta kásipkerlik sýbektileriniń jalaqysy saqtalmaityn demalystaǵy qyzmetkerlerine;
– karantin engizilgen eldi mekenderde qyzmetin júzege asyratyn iri kásipkerlik sýbektileriniń jalaqysy saqtalmaityn demalystaǵy qyzmetkerlerine;
– memlekettik mekemelerdi qospaǵanda, kommertsiialyq emes zańdy tulǵalardyń jalaqysy saqtalmaityn demalystaǵy qyzmetkerlerine;
– jeke kásipkerlerge;
– jeke praktikamen ainalysatyn adamdarǵa (notariýs, jeke sot oryndaýshysy, advokat, kásibi mediator);
– biryńǵai jiyntyq tólemdi tóleýshiler bolyp tabylatyn jeke tulǵalarǵa;
– nysanasy jumystardy oryndaý (qyzmetter kórsetý) bolyp tabylatyn azamattyq-quqyqtyq sipattaǵy sharttar boiynsha tabys tabatyn, salyq agentteri olar úshin mindetti zeinetaqy jarnalaryn aýdarǵan adamdarǵa.
