Foto: Lada.kz
Mańǵystaý oblysynda tabiǵi nysandy búldirgen azamat anyqtalyp, jaýapkershilikke tartyldy. Oqiǵa Ybyqty Sai shatqaly aýmaǵynda bolǵan, dep habarlaidy Ult.kz.
Politsiianyń málimetinshe, áleýmettik jelilerge júrgizilgen monitoring barysynda belgisiz er adamnyń jartastarǵa óziniń aty-jóni men avtokóliginiń memlekettik tirkeý nómirin jazyp ketkeni beinelengen video anyqtalǵan.
Jedel-izdestirý sharalary nátijesinde quqyq buzýshynyń kim ekeni belgili boldy. Ol 2005 jyly týǵan azamat. Er adam usaq buzaqylyq jasaǵany úshin ákimshilik jaýapkershilikke tartyldy.
Qazirgi tańda is materialy protsestik sheshim qabyldaý úshin sotqa joldanǵan. Sonymen qatar, quqyq buzýshy óz qolymen jazǵan belgilerin óshirip, tabiǵi aýmaqty bastapqy qalpyna keltirgen.
