Aqtóbe oblysynda shalǵaidaǵy 15 stansasynyń turǵyndaryna «Járdem» meditsinalyq poiyzynyń mamandary tegin meditsinalyq keńester men alǵashqy meditsinalyq kómek berdi, dep habarlaidy "Ult aqparat".
Qazirgi ýaqytta meditsinalyq poiyz Atyraý oblysynyń eldi mekenderin aralaýdy bastady, aldaǵy eki aptada ol oblystyń 9 shalǵai aýylyna toqtaityn bolady.
«Járdem» konsýltativti-diagnostikalyq poiyzynyń mamandary 4 702 turǵyndy, onyń ishinde Aqtóbe oblysynda 847 balany tekserdi. Jalpy, meditsinalyq tekserý sany - 28 090. 13 shaǵyn hirýrgiialyq ota jasaldy. Hirýrg dárigerdiń tekserýinde 1 543 adam boldy, ýrolog dárigerge 1 868 adam, ginekologqa 1 680 adam qaralǵan.
Emdelýshilerdiń kóp bóligi terapevt dárigerge kelgen – 4 702 adam, nevropatolog - 4 006, oftalmolog – 3 422 adam, LOR-mamany 2 934 naýqasty qabyldady.
Barlyǵy poiyz dárigerleri 2 143 EKG protsedýrasyn, 724 ýltradybystyq zertteý jáne 342 fliýorografiia ótkizdi.
«Biz birqatar aýrýlardy anyqtadyq, olardyń ishinde eń kóp taraǵany - qan qysymy, qant diabeti, bronh demikpesi. Eresekterdiń arasynda alqym isýi jii kezdesedi, al balalardyń arasynda temir tapshylyǵy anemiiasy, JRVI jáne kúrdeli bronhit kóp kezdesedi. Mundai jaǵdailarda biz patsientterge ne isteý kerek, kimmen bailanysý týraly keńes beremiz jáne qajet bolǵan jaǵdaida negizgi terapiia taǵaiyndaimyz»,- deidi poiyzdyń jalpy tájiribelik dárigeri Zarina Elmuratova.
Poiyzdyń jumys barysynda dárigerler keide tótenshe aýyr jaǵdailarǵa da tap boldy.
«Bizge 1939 jyly týǵan patsient tekseriske keldi, biz ol kiside gemoglobinniń óte tómen deńgeiin anyqtadyq – norma boiynsha 130-170 bolýdyń ornyna ol kiside 48 boldy. Shuǵyl túrde jedel járdem shaqyrylyp, ol kisi aýyr temir tapshylyǵy anemiiasy diagnozymen aýrýhanaǵa jatqyzyldy», - deidi «Járdem» meditsinalyq poiyzynyń bas dárigeri Ainur Eginbaeva.
Meditsinalyq brigada quramynda terapevt, pediatr, ginekolog, xirýrg, LOR, kardiolog, nevropotolog, oftalmolog, ýrolog, onkolog-mammolog jáne stomatolog sekildi barlyq sala dárigeri bar.
Naýqastar meditsinalyq mamandardan turaqty tekserýden ótý múmkindigi olar úshin óte mańyzdy ekendigin atap ótip, zor rizashylyqtaryn bildirip jatyr.
«Biz balalarymyzben meditsianlyq poiyz dárigerlerine tekserýge osymen ekinshi ret qatarynan keldik. Bastapqyda men jalǵyz keldim. Biz stomatolog jáne LOR dárigerdiń qabyldaýynda boldyq, bizge dárigerler bári jaqsy dep aitty. Dárigerlerge olardyń jumystary úshin alǵys aitamyz»,- deidi Shubarqudyq aýylynyń turǵyny Janar Beknazarova.
«Járdem» meditsinalyq poiyzy «Densaýlyq» meditsinalyq poiyzymen birge búgingi kúnge deiin respýblikanyń 50 myńnan astam turǵynyn tekserýden ótkizdi.
Joba «Samuryq-Qazyna» AQ kompaniialar tobynyń atynan «Samruk-Kazyna Trust» Áleýmettik jobalardy damytý qory jáne «QTJ» UK» AQ janyndaǵy Áleýmettik jobalar qorymen birge, sondai-aq QR Densaýlyq saqtaý ministrliginiń at salysýymen júzege asyrylyp jatyr.
