Adamzat násili eshqashan jumsaqtap aitqandy túsingen emes. Myńdaǵan ustaz keldi, milliondaǵan kitap jazylyp, nebir kórkem tásilmen gýmanistik ideialar taraldy. Joq! Adamzat túzý sózdi der kezinde qabyldamaidy. Mindetti túrde ia soǵys, ia bir ekologiialyq apat, ia basqa da katastrofalar nemese koronavirýs siiaqty osyndai bir indet bolý kerek. Sol kezde ǵana qaýipsizdiktiń ne ekenin, erkindiktiń ne ekenin, Táńirdiń tańǵajaiyp syiy - ómirdiń ne ekenin, baýyrlastyqtyń, dostyq pen tatýlyqtyń ne ekenin túsinip jatamyz. Ókinishke qarai, solai.
Jaratýshy adamzattyń esin osylai bir jiǵyzyp qoiady. Jáne rýhani evoliýtsiianyń kelesi bir satysyna kóterip otyrady. Biraq ol úshin adamzat nendei aqy tóleidi, nendei qurbandyqqa barady deseńizshi. Búgin bizdi ǵana emes, kúlli álemdi dúrliktirip otyrǵan myna virýs ta sondai bir jaza-sabaq siiaqty kórinedi maǵan. “Ne isteý kerek?” degen suraq qazir bárimizdiń kókeiimizde mazdap tur, órtene jazdap tur. Eń áýeli, qarapaiym ǵana joldy ustansaq deimin, ol - mamandardyń keńesterin buljytpai oryndaý. Virýsty juqtyrmaý úshin qandai shart bar, bárin tiisinshe isteý. Jurtty shatastyratyn aqparatty taratpaý. Ázil jaǵynan jarysyp, jamandyqty shaqyrmaý. Iaǵni gigienalyq talaptardy oryndap, rýhani-etikalyq printsipterden attamaý. Óitpesek, bolmaidy.
Buryn da jazǵanbyz osynda: bizdiń meditsina anaý Frantsiia, Italiia, AQSh, Koreia, Japoniiadaǵydai emes. Bular meditsinasy myń jerden damyp tursa da myna anturǵan keseldiń aldynda dármensiz. Merkel hanym myna dertke Germaniianyń 60-70 paiyz halqy shaldyǵýy múmkin dep saly sýǵa ketip ol otyr. Ainalaiyndar-aý, bizdiki ne taltań?!Aýrýhanalarymyz ańǵal-sańǵal, kóshe-bazar, t.b. jerlerdegi gigienalyq jaǵdaiymyz anaý, adal medikterimiz az, onyń ústine barlyq jerde jemqorlyq virýsy órship tur.
Endeshe bizge beiqam júrýge, bul jaǵdaiǵa qalai bolsa solai qaraýǵa bola ma? Bolmaidy, árine! Ózińdi aiamasań da, ózgeni aia. Ult dep urandatpai-aq qoiaiyn, ózińdi oila, ózińdi oilamasań, bala-shaǵa, týys-baýyryńdy oila! Sany az ultpyz, bizge ár adam qymbat. Ár adamymyzǵa janashyrlyqpen, qamqorlyqpen qaraiyqshy.
P.S. Jańa ǵana jaqynda toiy bolatyn bir kisimen sóilestim. Toidy keiinge qaldyratyn shyǵarsyń, Úkimet taratyp jatqan aqparat anaý desem, ol maǵan: “sol Úkimetiń meniń toiyma ketken aqshamdy qaitaryp bersin!” deidi. Al, ne áńgime bul?!
Qanyń osyndaida qainaidy ǵoi. Onyń toiy mindetti túrde ótý kerek eken de, biz soǵan baryp, qyrylyp qalýymyz kerek pe sonda?! Qudai saqtasyn, árine. Beti aýlaq bizdiń elden! Degenmen saq, sergek júreiikshi, aǵaiyn! Ońai jaǵdai emes bul.
Aqberen Elgezektiń feisbýktaǵy jazbasynan
