Japoniiada koronavirýs juqtyrý oqiǵalary búgin alǵash ret 1000-nan asty. COVID-19 juqtyrǵandar Tokionyń syrtynda kóp tirkelip jatyr, dep habarlaidy "Ult aqparat" Kyodo agenttigine silteme jasap.
Jańa juqtyrý oqiǵalarynyń rekordtyq kórsetkishke jetkenine turǵyny kóp prekfektýralar, onyń ishinde Aiti men Osakada syrqattanǵandar sanynyń artýy sebep boldy. Japoniiada 47 prefektýranyń ishinde buǵan deiin COVID-19 juqtyrý oqiǵasy tirkelmegen jalǵyz Ivatede búgin alǵashqy infektsiiaǵa shaldyqqan adam anyqtaldy.
Osaka prefektýrasy úkimeti 221 koronavirýs juqtyrý oqiǵasy tirkelgenin málimdedi.
Osaka sekildi Aitide de COVID-19 juqtyrýdyń táýliktik rekordy tirkeldi. Ekinshi kún qatarynan 167 virýs juqtyrý oqiǵasy anyqtalǵan.
Búgin Tokio biligi 250 virýs juqtyrǵan adam tirkelgenin habarlady. Japoniia astanasynda syrqattanǵandardyń jalpy sany 11 861-ge jetti. Onyń jartysy osy aida tirkelgen.
Eldegi koronavirýs juqtyrǵandar sanynyń úshten biri Tokionyń úlesinde, onda infektsiiaǵa shaldyqqandar sany 33 900-den asty, onyń 700-ge jýyǵy aqpanda Iokogama portynda karantinge jabylǵan Diamond Princess krýizdik lainerine tiesili.
Tokio biligi birneshe apta buryn eń joǵarǵy dabyl dárejesin engizgen bolatyn.
