Foto: pexels.com
Jambyl oblysynda politseiler jasóspirimderdiń úiden ketip qalý sebepteri týraly aityp berdi, dep habarlaidy Ult.kz.
Tártip saqshylarynyń aitýynsha, jyl basynan beri Jambyl oblysynda kámeletke tolmaǵan jasóspirimderdiń úiden ketýiniń 242 deregi tirkeldi, olardyń 215-i kezekshi táýlikte tabyldy, qalǵandarynyń turǵylyqty jeri birneshe táýlik ishinde anyqtalǵan.
Sebepterine toqtalsaq, politsiia statistikalyq taldaý júrgizgen. Olardyń ishinde mynadai sebepter atalǵan: otbasyndaǵy janjal jaǵdailary, ata-analardyń jumysbastylyǵy, nátijesinde balalardyń bos ýaqyty men bailanys ortasyna qatysty baqylaýdyń bolmaýy, kámeletke tolmaǵandardyń bos ýaqytynyń durys uiymdastyrylmaýy, kompiýterlik oiyndarǵa degen áýestik, otbasyndaǵy qolaisyzdyq jáne jasóspirimniń ózin-ózi baǵalaýy, ózin qurmetteýine, tótenshe, keide qaýipti joldarmen tanylýǵa jáne baqylaýdan shyǵýǵa degen umtylysy.
Balalar naqty mekenjaidy bilmei, avtobýspen júrip nemese úiden uzap bara jatqanda adasyp ketý, kezdeisoq ketý jaǵdaiy sirek kezdesip jatqany aitylady.
Máselen, 17 jastaǵy jasóspirim shkaftaǵy zattardy aqtaryp júrip, ájesiniń jasyrǵan aqshasyn taýyp alyp, oǵan uialy telefon satyp alǵan. Muny bilgen ájesi nemeresine urysady, al ol renjip úiden jasyryn ketip qalady. Politsiia jasóspirimdi tańerteń úiden 35 shaqyrym jerden tapqan.
Al 13 jastaǵy bala ata-anasymen sabaqtan tómen baǵa alǵany úshin urysyp, eshbir eskertpesten, dosynyń úiine qonady. Osyǵan qatysty ata-analarmen jáne kámeletke tolmaǵan jasóspirimdermen profilaktikalyq áńgimeler ótkizildi.
Qazirgi tańda úiden ketken barlyq jasóspirimder tabylyp, ata-analaryna qaitaryldy. Balalarǵa qatysty ne olardyń qatysýymen jasalǵan qandai da bir qylmys jasaý faktileri olardy izdestirý kezeńinde tirkelmegen. Barlyq balalardy izdeýge tek politsiia qyzmetkerleri ǵana emes, eriktiler men osyǵan bei-jai qaramaityn belsendi azamattar da qatysty.
