Oqiǵa kýágeri Rýslannyń aitýynsha, Primorskii aýdany tusynan ótip bara jatqanda tútin shyǵyp jatqan avtobýsty kórip, birden soǵan qarai júgirgen.
"Avtobýsqa qarai júgirgenimde, kapottyń aldyńǵy jaǵy órtenip jatty. Kólikte balalar boldy. Qansha ekenin naqty aita almaimyn, biraq avtobýstyń artynda bala tolyp otyrdy. Adamdar júgirip kelip, balalardy shyǵarýǵa kómektesti. Balalardy bir-birimizge berip turdyq. Olar qorqyp qaldy. Sońǵy balany shyǵarǵanda avtobýs túgel otqa orandy", - dedi tótenshe jaǵdai kýágeri Rýslan.
Ekinshi kýáger de órtengen avtobýsta balalar bolǵanyn aitty.
"30-ǵa jýyq bala boldy, olardy tez arada basqa avtobýsqa otyrǵyzyp, alyp ketti. Sodan keiin ata-analar kelip jylap, aiqai-shý bastalyp ketti. Olar balalaryn basqa avtobýsqa otyrǵyzǵanyn bilmegen shyǵar", - dedi ekinshi kýáger.
Avtobýsta jolaýshylar, onyń ishinde balalar qaitys bolǵany týraly aqparat Instagram jelisindegi Aqtaý-paraqshasynda joqqa shyǵaryldy.
"PAZ-320530 markaly jolaýshy avtobýsy jol boiynda tolyq janyp ketti, órtsóndirýshiler kelgen kezde avtobýsta jolaýshylar bolǵan joq. Zardap shekkender joq. Órt 17:43-te sóndirilgen. Onyń sebebi anyqtalyp jatyr", - delingen habarlamada.
Lada basylymynyń redaktsiiasy órtengen avtobýs mektepke tiesili me, joq pa degen suraqqa jaýap kútip otyr.
