Jany qurban bolǵan dárigerlerge taǵzym etemiz. Búgin biz olardy eske alyp, virýsqa qarsy qaitadan kúsh biriktirý úshin jumylýymyz kerek. S.Asfendiiarov atyndaǵy Qazaq Ulttyq meditsinalyq ýniversitetiniń rektory Talǵat Nurǵojin osylai málimdedi, dep habarlaidy QazAqparat.
«Prezidentimiz Qasym-Jomart Toqaevtyń jarlyǵymen búgin, iaǵni 13 shilde - COVID-19 qaza bolǵan qazaqstandyqtardy ulttyq aza tutý kúni bop belgilendi. Búgin biz olardy eske alyp, virýsqa qarsy qaitadan kúsh biriktirý úshin jumylýymyz kerek. Ókinishke orai, bul virýs odan ári taralýyn toqtatar emes. Bireýdiń anasyn, ákesin, baýyryn jalmap jatyr. Barlyq qorǵanys sharalaryna qaramastan aq halatty abzal jandar da Covid-19 qurbany bolyp jatyr. Patsienttiń densaýlyǵyn saqtaý jolynda óz ómirin pida etken áriptesterime tizemdi búgip, basymdy iemin. Olardyń kópshiligi áli de virýspen kúreste tik tur. Olar – naǵyz batyrlar degim keledi», - dedi Talǵat Nurǵojin.
Spiker Memleket basshysynyń halyq densaýlyǵyn saqtaýda bar sharalardy jasap jatqanyn aitty.
«Aýrhanalar men dárihanalardy dárimen qamtý jaqyn arada qalpyna keltiriledi. PTR taldaýlary da kóbeiedi. Jyljymaly zerthanalar ashylady. Naýqastarǵa qosymsha statsionarlyq oryndar ashylady. S.Asfendiiarov atyndaǵy Qazaq Ulttyq Meditsinalyq ýniversitetiniń professorlyq oqytýshylyq quramy, rezidentteri men erikti stýdentteri Covid-19 kúreske belsene qatysyp jatyr. Prezidentimiz aitqandai, tek dárigerler men memlekettiń kúshi bul kúreste jetkiliksiz. Ár qazaqstandyq belsene kirisýi kerek. Mamandardyń usynysyn buljytpai oryndaǵan jaǵdaida ǵana biz bul indetti birge jeńemiz», - dedi T.Nurǵojin.
Aita ketý kerek, búginde Qazaqstanda 59 899 adam koronavirýs juqtyrǵan. Onyń ishinde 34 190 adam jazylyp shyqsa, 375 adam koronavirýstan kóz jumdy.
