Qazaqstanda janýarlarǵa qatygezdik kórsetken adamdardyń 2 jylǵa deiin bas bostandyǵy shektelýi múmkin. Bul týraly búgin Ortalyq kommýnikatsiialar qyzmetinde ótken brifingte Ekologiia, geologiia jáne tabiǵi resýrstar ministri Maǵzum Myrzaǵaliev aitty, dep habarlaidy QazAqparat.
«Adamdar tarapynan janýarlarǵa ne úshin qatygezdik jasalatyny túsiniksiz. Bul aqtaýǵa kelmeidi. Kún saiyn áleýmettik jelilerde aqylǵa syimaityn áreketter jariialanyp jatady. Aqqýdy tunshyqtyryp, itbalyqty uryp, itti qorlap jatqanyn kórdik. Buǵan uqsas faktiler kóp. Sondyqtan jazany kúsheitý qajet», - dedi Maǵzum Myrzaǵaliev OKQ-da ótken baspasóz máslihatynda.
Ministr atap ótkendei, sondyqtan búginde Qylmystyq kodekstiń 316-baby («Janýarlarǵa qatygezdik jasaý») boiynsha jazany kúsheitý usynylyp otyr.
«Aiyppul ulǵaiady, tipti bas bostandyǵyn shekteý jazasy engizilýi múmkin. Zań jobasy jaqynda Májiliske joldandy. Budan bólek depýtattarmen, janýarlardy qorǵaýshylarmen birge Janýarlardy qorǵaý týraly zań jobasy ázirlendi. Onyń júzege asýy janýarlarǵa adamgershilikpen, jaýapkershilikpen qaraýdy qamtamasyz etedi. Túrli sanattaǵy janýarlarǵa qaraý boiynsha jalpy jáne arnaiy talaptar bekitiledi. Sonymen birge janýarlarǵa jasalǵan kez kelgen qatygezdik áreketke qatysty jaýapkershilik ilespe zańda qarastyrylǵan», - dedi ministr.
Atap óterligi, jańa qujatta jabaiy, úi, qyzmettik jáne aýyl sharýashylyǵy janýarlaryna jasalatyn qatygezdiktiń aldyn alý sharalary tolyq qaralǵan. Janýarlarǵa veterinarlyq kómek, tiisti kútim jasaý, oiyn-saýyqtyq maqsatta paidalaný erejeleri bekitilgen. Al janýarlarǵa qatygezdikti nasihattaýǵa tyiym salynǵan.
