Búgin Túrkistan qalasynda Qazaqstan Respýblikasynyń Táýelsizdigi kúnine arnalǵan «Táýelsizdik – tuǵyrym!» atty merekelik is-shara ótti. Elimizdiń eń ulyq merekesine jiylǵan jurtshylyqty Túrkistan oblysynyń ákimi Janseiit Túimebaev quttyqtap, Táýelsizdik týraly tebirenisterin ortaǵa saldy, dep habarlaidy "Ult aqparat" óńir basshysynyń baspasóz qyzmetine silteme jasap.
«Táýelsizdik — uly uǵym. Jumyr jer betinde azattyǵyn ańsap, bostandyqqa qol jetkize almai júrgen ulttar kóp. Jyl, ai emes, minýt saiyn qubylatyn almaǵaiyp zamanda Qazaqstanymyzben maqtanyp qana qoimai, táýelsizdigimizdi tuǵyrly etý úshin barshamyz eńbek etýge tiistimiz. Biyl Táýelsizdik kúni merekesin jańa oblys ortalyǵy — Túrkistan qalasynda tuńǵysh ret atap ótýdemiz. Bul da - tarihi oqiǵa. Búginde Elbasymyzdyń qoldaýymen Túrkistanymyz túrlenip, oblysymyzdyń áleýeti kóterilip keledi. Jyl basynan beri ónerkásip óniminiń kólemi 409,6 mlrd. teńgeni qurady. Aýyl sharýashylyǵynyń jalpy ónim kólemi 508,2 mlrd. teńgege jetse, shet elderge et 6,2 myń tonna et eksporttaǵan oblysymyz bul kórsetkish boiynsha respýblikada 1-oryndy ielendi. 11 aida qurylys jumystarynyń kólemi 110 mlrd. teńgege, al, paidalanýǵa berilgen turǵyn úidiń jalpy alańy 374,8 myń sharshy metrdi qurady. Qazirdiń ózinde «Riksos» qonaq úii men iskerlik ortalyǵynyń qazyǵy qaǵyldy. Taiaýda Túrkistan qalasynda 30 iri nysannyń qurylysy bastalady. Elbasymyzdyń qoldaýymen Túrkistannyń tynysy ashylyp, jańa maqsattar men mejeler aiqyndalýda. Barshańyzdy Táýelsizdik kúnimen quttyqtai otyryp, otbasylaryńyzǵa amandyq, igi bastamalaryńyzǵa sáttilik tileimin», — óńir basshysy eńbegimen daralanǵan 55 adamǵa túrli marapattardy saltanatty túrde tapsyrdy.
Merekelik keshte Túrkistan oblysynyń «Qazyna», «Tumar» bi ujymdary men oblystyq opera jáne balet teatrynyń ónerpazdary «Atameken» horeografiialyq kompozitsiiasyn usyndy. Jeztańdai ánshiler «Ainaldym elim», «Qazaǵym», «Nur-Astana», «Qalam meniń – Túrkistan», «Otan», «Qazaqstanym» jáne ózge de patriottyq ánderdi shyrqady.
Boiǵa jiger, júrekke jalyn beretin keshke qatysqan kópshilik Táýelsizdikti tuǵyrly, Túrkistandaǵy bastamalardy ǵumyrly etýge ýaǵdalasyp, kóterińki kóńil-kúide tarqasty.
