Jambyl oblysynda patrýldik politsiia qyzmetkerleri sýǵa batyp bara jatqan 16 jastaǵy jasóspirimdi qutqaryp qaldy, dep habarlaidy ult.kz.
Oblystyq politsiia departamentiniń málimetinshe, oqiǵa týraly habarlama «102» arnasyna túsken. Qala turǵyndarynyń biri jasóspirimniń sýǵa batyp bara jatqanyn aityp, shuǵyl kómek suraǵan.
Politsiianyń málimetinshe, balyq aýlap júrgen jasóspirim sýǵa qulap, aiaǵy tasqa ilinip qalǵandyqtan, ózdiginen jaǵaǵa shyǵa almaǵan.
Oqiǵa ornyna jetken patrýldik politsiia qyzmetkerleri – politsiianyń aǵa leitenanty Mahambet Shaianbaev pen politsiia leitenanty Qasymhan Qalaýbek dereý sýǵa túsip, jasóspirimdi aman alyp shyqqan.
Qutqarylǵan bala jedel meditsinalyq járdem brigadasyna tapsyryldy. Dárigerlerdiń málimetinshe, onyń jaǵdaiy jaqsy.
