Búgin Ońtústik Qazaqstan oblysynyń ákimi Janseiit Túimebaev aqyn-sazger, dramatýrg, Táýelsiz «Platinaly Tarlan» syilyǵynyń jáne memlekettik «Parasat» ordeniniń iegeri Israil Saparbaidy qabyldady, dep habarlaidy "Ult aqparat" aimaq basshysynyń baspasóz qyzmetine silteme jasap.
Kezdesýde ákim aqyn-sazgerdiń 75 jyldyq mereitoiymen quttyqtap, táýelsiz elimizdiń rýhani bailyǵyn arttyrýdaǵy eńbeginiń eselene túsetinine senim bildirdi.
«Biz Sizdi aqyn, kompozitor, dramatýrg retinde elge sińirgen abyroily eńbegińizben elimizdiń poeziiasy men óneriniń damýyna zor úles qosyp kele jatqan, óziniń dara joly bar el azamaty retinde maqtan tutamyz. Siz 160-tan asa ánder men 150-ge tarta án mátinderiniń avtorysyz. «Saǵynysh sazy», «Júrekke júrek til qatar», «Shymkentim shyrailym», «Nostalgiia», «Toibastar», «Egiz lebiz» «Táýelsizdik urany» jáne taǵy basqa da ánderińiz halyq arasyna keń tarap, súiip tyńdaityn ánderge ainaldy»,-dedi ákim óz sózinde.
Sonymen qatar, aimaq basshysy jas urpaqtyń boiyna ulttyq qundylyqta¬rdy sińirip, olardyń rýhani, mádeni bolmysyn qalyptastyrý maqsatynda jáne meroitoi iesiniń qurmetine orai uiymdastyrylyp otyrǵan respýblikalyq án baiqaýynyń sátti ótýine tilektestigin bildirdi.
Kezdesýde eki jaq Elbasynyń «Bolashaqqa baǵdar: rýhani jańǵyrý» maqalasyndaǵy «Týǵan jer» baǵdarlamasyn júzege asyrý jaiy men óńir mádenietinyń damýy boiynsha sóz qozǵap, eldiń rýhyn biiktetetin aqyn-sazgerlerdiń shyǵarmashylyǵyn jastar arasynda keńinen nasihattaý qajettigin aitty.
Aita keteiik, Erteń saǵat 19: 00-de Shymkent qalasyndaǵy «Túrkistan» saraiynda Israil Saparbaidyń 75 jasqa tolǵan mereitoiyna orai «Erkindigim - Eldigim» atty án baiqaýynyń qorytyndy Gala-kontserti ótedi. Kontsertke QR eńbek sińirgen artisi Sembek Jumaǵaliev, QR eńbek sińirgen qairatkerleri Ábiirbek Tinaliev jáne Shahizada Baipatshanova, qazaq estradasynyń ánshisi Tańat Mamyrhan jáne Ońtústik Qazaqstan oblysynyń óner maitalmandary qatysady.
