Qazaqstandyq boksshy Janqosh Turarov (25-0, 18 KO) óziniń otandasy jáne dosy Qanat Islamdy (28-1, 22 KO) qoldady, - dep habarlaidy Tengrinews.kz Vesti.kz-ke silteme jasap.
"Keshegi Qanat baýyrymnyń kezekti kezdesýinde eki taraptyń da myqtylyǵyn kórdik. Jekpe-jektiń sońyna deiin taqymymyzdy qysyp, úlken úmitpen otyrdyq. Qanekeń ekeýmiz Maiami qalasynda 3 jyl birge turyp, bir nandy talai bólistik. Eńbekqorlyǵy men adamgershiligimen erekshelenetin baýyr aǵama esh moiyma degim keledi. Bul - úlken sport! Jeńis bar jerde jeńilis te bolary zańdylyq.
Álemge tanymal uly bokserlarymyzdyń da tarihynda jeńilistiń ashy dámi sezilgen. Osy kúnge jetýdiń ózi de úlken jeńis! Muhit asyp, densaýlyqty táýekelge tigip, el namysyn qorǵaýdyń artynda qansha ter men kúshtiń jumsalatyny senimen men jaqsy túsinemiz. Qaneke baýyrym, jeńisti kúnderiń áli de alda. Esh moiymai, aldaǵy jekpe-jekke odan ary qairatty bolyp oralatynyńa senimdimiz! Eliń senimen árdaiym maqtanady", - dep jazdy boksshy Instagram jelisindegi paraqshasynda.
Eske salaiyq, 26 aqpanda Qanat Islam (28-0, 22 KO) orta salmaqtaǵy WBO Global belbeýi úshin aiqasyn ótkizip, karerasynda alǵash ret jeńildi. Bul aiqas AQSh-tyń Plant-Sitidegi boks keshinde ótti. Al qazaq boksshysynyń qarsylasy ulybritaniialyq Djimmi Kelli (25-2, 10 KO) boldy. On raýnd qorytyndysy boiynsha tóreshiler jeńisti britaniialyqqa berdi.
