Aqmola oblysynda Jánibek hannyń ortaǵasyrlyq kesenesiniń qirandylaryn ǵylymi-zertteý jumystary aiaqtalýǵa jaqyn. Arhelogiialyq qazba jumystary kezinde tabylǵan zattar Japoniiaǵa genetikalyq saraptamadan ótkizýge jiberildi. Bul týraly oblystyq mádeniet, arhivter men qujattamalar basqarmasy basshysynyń mindetin atqarýshy Gúlmira Beknazarova jýrnalistermen ótken brifingte aitty, dep habarlaidy QazAqparat.
«2018 jyly oblystyq mýzeige arheologiialyq qazba jumystaryn júrgizý úshin berilgen litsenziianyń arqasynda Qorǵaljyn aýdany aýmaǵynda ornalasqan Jánibek hannyń ortaǵasyrlyq kesenesiniń qirandylaryn ǵylymi-zertteý boiynsha qolǵa alynǵan jumystar aiaqtalýǵa taiaý. Bul jobaǵa 2019 jyly oblys ákimdigi tarapynan qarjylai qoldaý kórsetildi», - deidi Aqmola oblysynyń mádeniet, arhivter men qujattamalar basqarmasy basshysynyń mindetin atqarýshy Gúlmira Beknazarova.
Basqarma basshysy atap ótkendei, keseneni zertteý jumystary 2 kezeńmen júrgizilgen. Jánibek-Shalqar kesenesiniń qirandylarynan tabylǵan zattardy jan-jaqty zerttegennen keiin ǵalymdar osynda han áýletiniń ókilderi jerlengen degen qorytyndyǵa kelgen.
«Tabylǵan arheologiialyq jádigerler Nur-Sultandaǵy Qazaqstan Respýblikasynyń Ulttyq mýzeiine ótkizilip, sodan keiin Reseidegi antropologiialyq kórinisti anyqtaý úshin Japoniiaǵa genetikalyq saraptamaǵa jiberildi. Zertteý qorytyndysy biylǵy jyldyń sońynda shyǵarylady. Biraq biz qazirdiń ózinde tarihi sensatsiianyń aldynda turmyz dep úmittenemiz», - dep tolyqtyrdy Gúlmira Beknazarova.
Aita keteiik, oblystaǵy 11 murajai óz jobalaryn iske asyrýdy toqtatqan joq. Aǵymdaǵy kezeńde 1 595 ekskýrsiia, 439 dáris, 238 kórme uiymdastyrylyp, 936 murajai zattary alynyp, óńdelgen.
