Qostanai oblysy Jangeldin aýdanynyń ekologiiasyna zymyran qaldyqtary qulaǵannan esh ziian kelmeidi. Bul týraly búgin QR Parlamenti Májilisinde elimizdiń Qorǵanys jáne aeroǵarysh ónerkásibi ministri Beibit Atamqulov BAQ ókilderiniń saýalyna orai aitty, dep habarlaidy QazAqparat.
«Bul másele memlekettik organdarmen áli kelisilgen joq. Sonymen qatar aǵymdaǵy jyldyń kúzinde Jangeldin aýdanyna qosymsha baryp qaitý josparlanǵan. Aǵymdaǵy jyly josparly ushyrýlar kózdelip otyrǵan joq. Bólingen jer 22 shaqyrymǵa 44 shaqyrym. Ekologiialyq qaýipsizdikke qatysty aitar bolsam, ekologiialyq saraptama qazaqstandyq taraptan da, reseilik taraptan da júrgizildi. Buǵan qosa, qoǵamdyq birlesikter deekologiialyq qaýipsizdikke, ásirese jan-janýarlar álemine zertteý júrgizdi. Keleshekte ushyrý boiynsha sheshim qabyldanyp jatatyn bolsa, onda úsh jyldyń ishinde 7 ushyrý ǵana bolatynyn taǵy da aitamyn. Ottekti-kerosindi otyndy qozǵaltqyshy bar ekologiialyq taza zymyran qoldanylatyn bolady», - dedi ministr.
Beibit Atamqulovtyń dereginshe, zymyran ushyrǵannan keletin ekologiialyq shyǵyn Qazaqstannyń áýe keńistiginen ushaqtardyń ushyp ketýinen keletin shyǵynnan 75 ese tómen. Zymyran bólshekteri qulaýǵa bólingen jer memlekettik qorda tur jáne ol aýyl sharýashylyǵy úshin paidalanylmaidy.
Buǵan deiin habarlanǵandai, Jankeldin aýdany aýmaǵynan zymyran qaldyqtaryn qulatý úshin 76 myń gektar jer 3 jylǵa beriletin bolyp sheshildi. Qaldyqtar belgilengen jyldar ishinde birneshe ret qulaidy. Sondai-aq, aýdan biýdjetine jyl saiyn 151 mln teńge qarjy aýdarylady. Al irgesine qaldyq tastalatyn Aqkól men Qarasý aýyldaryna jedel járdem kólikteri bólinip, aýyzsý tartylady.
