Qyzylsha aýrýy qazirgi tańda álem elderin birshama abdyratyp otyr. Tipti Ýkrainada qyzylsha aýrýyn juqtyrǵandardyń sany 38 myńǵa jetken. Al Qazaqstandaǵy ahýal qandai? Ol týraly OKQ-da ótken baspasóz máslihatynda QR Densaýlyq saqtaý ministrligi Qoǵamdyq densaýlyq saqtaý komitetiniń tóraǵasy - bas memlekettik sanitar dáriger Jandarbek Bekshin aityp berdi, dep habarlaidy QazAqparat tilshisi.
«Bizdi alańdatatyny - qyzylsha aýrýy. Biletinderińizdei, qyzylsha búkil álemdik másele. Nege deseńiz, álemde barlyq elderde 300 myńnan astam qyzylshamen aýrý jaǵdaiy tirkeldi. Onyń ishinde tek Eýropa elderinde 70 myńnan astam adam qyzylsha juqtyrǵan. Bizdiń zertteýimiz boiynsha, qazirgi tańda dál osy Eýropa elderindegi qyzylshanyń túrleri tirkelip jatyr. Bul - bizdiń jasalǵan taldaýymyz. Nege deseńiz, bizdiń elimizdiń turǵyndary qarym-qatynas boiynsha kóptep saiahatqa shyǵady, issaparlarǵa barady. Ókinishke qarai, Eýropada 68 jaǵdai ólimmen aiaqtalǵan. Bizdiń saiahatshylarymyz, turǵyndarymyz jolǵa shyqqan kezde ózderiniń jolyn josparlaýy kerek. Nege deseńiz, árbir azamat shyǵatyn eliniń epidemiologiialyq ahýalyn bilip alýy tiis. Balalary qyzylsha boiynsha egilmese, mindetti túrde ekpe jasatý kerek», - deidi Jandarbek Bekshin.
Onyń aitýynsha, qyzylsha boiynsha Serbiia elinde 5 myńnan astam, Italiia men Frantsiiada 3 myńdai, Ýkrainada 38 myńdai, Ulybritaniiada 1 myńǵa jýyq jaǵdai tirkelgen. Bizdiń eń jaqyn kórshilerimiz - Qyrǵyzstanda 1,5 myń jáne Reseide 4 myńdai jaǵdai anyqtalǵan.
«Sol sebepti, biz osy baǵytta jumysty josparlap, aldyn alý sharalaryn júrgizip jatyrmyz. Aldyn alý sharalary qazirgi tańda oryndalýda. Bizde egý úshin vaktsina kólemi tolyǵymen qamtyldy. Elimizde turyp jatqan turǵyndardy vaktsinatsiiaǵa shaqyramyz. Biylǵy jyldyń ereksheligi - egilmegen adamdardyń 60 paiyzy 1 jasqa kelgen balalar. Bizdiń elimizde balalardyń birinshi ekpesi 1 jasta, ekinshisi 6 jasta jasalady. Sondyqtan, 12 ai jetpei, 6 ai, 7 ai, 8 aida aýyryp jatyr. Sondyqtan, biz arnaiy is-shara qabyldaýdamyz.
Mektepterde filtr jasap, balalardy adamdar kóp jinalatyn jerge aparmaý kerek. Árine, eń aldymen halyq arasynda aǵartý jumystaryn júrgizip jatyrmyz. Sebebi, áli de osy ekpeden bas tartyp jatqan azamattar bar. Turǵyndardyń keibir bóligi qyzylshany aýrý dep sanamaidy. Al aýrýǵa shaldyqqan balalardyń derti erteń asqynýy múmkin. Asqynǵan túri - pnevmoniia. Ekinshisi - entsifalit, bronhit, al eń aýyry - panentsifalit. Bul aýrýdyń ereksheligi - infektsiia óz-ózinen basylmaidy. Kúni erteń depressiia jaǵdaiynda aýrý shyǵyp ketedi», - dedi Jandarbek Bekshin.
Onyń aitýynsha, qyzylsha eń kóp tirkelip jatqan aimaqtar - Astana, Almaty, Atyraý, Shymkent qalalary jáne Aqmola oblysy. Bul aimaqtarda balalardyń egilýi 9 aidan bastalady.
