Elorda ákimi Altai Kólginov «Jastar» aýdanyndaǵy tazartý qondyrǵysynyń qurylysymen arnaiy baryp tanysty, dep habarlaidy "Ult aqparat" qala ákimdigine silteme jasap.
«Qurylys júrgizip, injenerlik jelini tartý barysynda jaýyn-shashyn kárizderi men kollektorlardy da umytpaǵan jón. Olardy tazartyp, qaraýsyz qalǵan jaýyn-shashyn kárizderi men aryq júiesin balansqa alyp, jaýyn-shashyn qubyrlaryna zańsyz jalǵanýdy anyqtap, t.s.s. jumystardy josparly túrde júrgizý kerek.
Jarty jyl ishinde ótkizý qabiletin jaqsartý maqsatynda 54 shaqyrym kollektor, 4 myń jańbyr sýyn jinaý jáne qadaǵalaý qudyǵy, 32 myń metr aryq júiesi tazartyldy. Aryqtar men qudyqtardan shyǵarylǵan qoqystyń ózi 2,5 myń tonna boldy, osyndai jumys kóp. Jaýyn sýy aǵatyn qubyrlarǵa 230 úi-jaidyń zańsyz jalǵanǵany anyqtaldy. Bul jumys turaqty atqarylyp keledi», - dedi Altai Kólginov.
Onyń aitýynsha, «Jastar» aýdanyndaǵy, iaǵni J.Táshenov pen Amman kósheleriniń qiylysyndaǵy tazartý qondyrǵysynyń qurylysy jaýyn-shashyn kollektorlarynyń rekonstrýktsiiasyn da qamtidy.
«Búgingi aralaý barysynda «Jastar» aýdanyndaǵy (J.Táshenov pen Amman kósheleriniń qiylysy) tazartý qondyrǵysynyń qurylysymen tanystym. Bul qurylys kelip turǵan jaýyn-shashyn kollektorlarynyń rekonstrýktsiiasyn da kózdeidi. Bul jobany biz eki kezeńde júzege asyramyz.
Birinshi kezeńi - byltyrǵy kúzde bastaldy. Buryn qaldyq sý ózenge tikelei aǵyzylyp, ony lastap, qala ekologiiasyna keri áserin tigizetin. Josparymyz júzege asqan soń, endi jańbyr men qar sýy Esilge aǵyzar aldynda tazartylatyn boldy», - dedi qala ákimi.
Altai Kólginov biylǵy kóktemde bul jospardyń ekinshi kezeńi aiaqtalatynyn atap ótti.
«Nátijesi – jaýyn-shashyn kollektorlary rekonstrýktsiialanady. Jańa qondyrǵylardyń qýaty táýligine 42 myń tekshe metr. Bul qondyrǵylar J.Táshenov, Baraev, Sh.Ýálihanov, Sh.Imanbaeva jáne Respýblika dańǵylyn sý basýdan saqtaidy.
Qondyrǵylar jer astymen júrgizilip, al ústine - kishi arhitektýralyq músindermen kómkerilgen ári jasyl jelekti skver salamyz.
Sonymen birge, B. Momyshuly kóshesindegi problemaly jerge jaýyn-shashyn káriz júiesiniń magistraldyq kollektorynyń qurylysy aiaqtaldy. Jańa qondyrǵy qazirgi jaýyn-shashyn kárizderiniń ótkizý qabiletin 1,5 esege arttyrady», - deidi ákim.
Al Telman turǵyn alabynyń tazartý qondyrǵylary men magistraldy kollektorynyń ótkizý qabileti táýligine 36 myń tekshe metr bolmaq.
«Joba júzege asqan soń - osy alaptyń jáne № 27 kósheniń qurylys júrýi múmkin aýmaqtarynan jańbyr sýyn aǵyzyp áketý múmkin bolady. Buǵan qosa, birshama tazartý qondyrǵylary men jaýyn-shashyn kárizderi basqa jerlerge de salyndy. Bul jumystar júieli túrde júrgizilip keledi», - dedi Altai Kólginov.
