Fristail-akrobatikadan Qazaqstan komandasynyń úzdigi Janbota Aldabergenova óziniń úshinshi Olimpiadasynda baq synady. Beijińde ol finalǵa shyǵa alǵan joq. Dese de, ol komandalasy Aqmarjan Qalmurzaevanyń aqtyq synda óner kórsetkenin maqtan tutady. Olympic.kz saityna suhbat bergen sportshy Olimpiadadaǵy ónerine baǵa berdi, dep habarlaidy "Ult aqparat".
«Keshegige qaraǵanda, búgingi kún raiy jaqsy boldy. Qar jaýǵan joq, kúnniń kózi jarqyrap turdy. Keshegi jattyǵý kezinde biz eki retten sekirdik. Senesiz be, bizdiń jyldamdyǵymyz azaiyp ketti. Máselen, úsh ainalym sekirýdi oryndaý úshin saǵatyna 65 shaqyrym jyldamdyqpen kelý qajet. Aýa raiynyń qolaisyzdyǵyna bailanysty bul jyldamdyqty da ala almadyq. Eger jarysty keshe ótkizgende, jaraqat kóp bolýshy edi.
Alǵashqy múmkindigimde men óte baǵaly elementti oryndadym. Odan da qiyndaý elementti finalǵa saqtaǵan edim. Ókinishke qarai, irikteýden óte almadym. Sekirýdi óte keremet oryndasam da, jerge túserde qatelik ketti. Eger bárin jattyǵýdaǵydai oryndaǵanda finalǵa birinshi orynmen shyǵar ma edim?! Ókinishke qarai, bulai bolmady...
Ekinshi sekirý kezinde sál ońailaý elementti oryndadym. Bárin ádemi jasaǵanyma senimdi edim. Alǵashynda biz birinshi sekirýden soń-aq finalǵa shyǵamyz dep oilaǵanbyz. Jaqsy oryndap shyqtym, biraq tóreshilerge unamady. Nátijesinde, Olimpiadany erte aiaqtadym.
Qalmurzaevanyń Olimpiada finalyna shyqqanyna qýanyshtymyn. Birinshi múmkindigin ol týra irikteýdegidei oryndap jatqan. Biraq bir jerden qate jibergen bolýy kerek. Sportshy retinde ony jaqsy túsinemin. Bul – álem kýbogi emes, bul – Olimpiada. Ekinshi ret sekirgen kezinde tóreshiler, tipti, tómendetip tastady.
Qorytyndy qandai bolsa da, ol birinshi ret Olimpiada finalyna shyqty. Sony maqtan etemin.
Bul – meniń úshinshi Olimpiadam. Birinshi oiynǵa bararda qorqynysh bolǵan. Sebebi, Olimpiadanyń ne ekenin bilmedim. Ekinshi ret Olimpiadaǵa úlken úmitpen attandym. Óitkeni, Sochide finalǵa shyqtym ǵoi. Nátijemdi jaqsarta túskim kelgen. Men oilaǵandai bolmady. Bul – sport. Óte qiyn sport túri. Jyl ótken saiyn erejeler qiyndai túsýde. Qazir úsh ainalym sekirý elementin oryndamasańyz, jarysqa barýdyń qajeti joq. Jalpy alǵanda, biz – óte myqty áielmiz. Bizge jankúier bolyp, qoldaý kórsetken jandarǵa alǵysymdy aitamyn», - dedi sportshy.
Janbota Aldabergenova Olimpiada oiyndaryn 13-shi satyda aiaqtady. Aqmarjan Qalmurzaeva tórtjyldyq dodasynda 11-shi oryn aldy.
