"Qazir janaza kóp, qurmetti aǵaiyndar, et jaqyny bolmasańyzdar, janaza rásimderine barmańyzdar". Belgili dintanýshy Qairat Joldybaiuly qazaqstandyqtarǵa osyndai úndeý jasady, dep habarlaidy Tengrinews.kz.
"Ardaqty aǵaiyndar! Qazirgi indetke bailanysty men sizderge mańyzdy bir úndeý tastaǵym kelip otyr. Janaza kóbeidi. Kún saiyn qaraly habardy estip, júregimiz aýyryp, kóńilimiz qulazyp, qabyrǵamyz qaiysýda. Ókinishke orai, áli kúnge deiin aýyl-aýylda, tipti qalalarda qudalyq siiaqty toi-tomalaq áli úzilmei tur, jalǵasyp jatyr. Sony doǵaryńyzdar. Bolmaidy... Sebebi sol qudalyqqa, sol qýanyshqa kelgen kisilerdiń arasynan osynaý dertke shalynyp, qanshama adam myna dúniemen qoshtasyp jatyr. Sondyqtan toidy, tomalaqty, qudalyq siiaqty rásimderdi doǵaryńyzdar. Qazir janaza kóp, qurmetti aǵaiyndar, et jaqyny bolmasańyzdar, janaza rásimderine barmańyzdar", - dedi Qairat Joldybaiuly Instagram jelisindegi paraqshasynda.
Dintanýshy jaqynynan aiyrylǵan qazaqstandyqtarǵa týystaryna "sizderdi túsinemiz, janazaǵa kelmei-aq qoiyńyzdar" dep aitýyn surady.
"Qurmetti janaza ieleri, aǵaiyn-týysqa aityńyzdar: "biz sizderdi túsinemiz, janazaǵa kelmei-aq qoiyńyzdar. Myna indet bitkennen keiin, ólimge qatysty barlyq rásimdi jasaimyz, sol kezde kelesizder" dep aityńyzdar. Qurmetti aǵaiyndar, az ǵana qazaq qyrylyp qalmasyn desek, toi-dýmandy, qudalyq siiaqty rásimderdi toqtatyńyzdar. Janazaǵa barmańyzdar", - dedi ol.
Eske salaiyq, qazir elimizde koronavirýs juqtyrǵandar jáne pnevmoniiamen aýyryp jatqandar sany kóbeidi. Sol sebepten karantin sharalary kúsheitildi, azamattar qashyqtyq saqtap, sanitarlyq sharalardy oryndaý kerek.
