Densaýlyq saqtaý ministrligi 8 sáýirde Mańǵystaý oblysynda - bir, Atyraý oblysynda tórt adamnan koronavirýs tabylǵanyn habarlaǵan bolatyn.
Resmi málimet boiynsha, Mańǵystaý oblysynda 1974 jylǵy Jańaózen turǵynynan virýs tabylǵan. Pnevmoniia belgileri baiqalǵan naýqas 7 sáýirde dárigerge kóringen. Infektsiialyq aýrýhanaǵa jatqyzylyp, analiz alynǵan. Virýs juqqany anyqtalǵan.
Oblystyq densaýlyq saqtaý basqarmasynyń habarlaýynsha, dáriger-mamandar (infektsionist, reanimatolog, terapevt) materialdyq-tehnikalyq jáne jeke qorǵanysh quraldarymen tolyqqandy qamtylǵan.
Qazir infektsiia anyqtalǵan oshaqqa jáne onyń aýmaǵyna dezinfektsiialaý jumystary júrgizilýde. Bailanysta bolǵandar sanyn anyqtaý boiynsha epidemiologiialyq tekserister men is-sharalar júrgizilip jatyr. Naýqastyń qaida jumys istegeni, kimdermen bailanysta bolǵany zerdelenýde.
Atyraý oblysynda Teńiz kenishinde vahtalyq poselokta isteitin 1970 jylǵy áielden virýs tabylǵan. Ol "Teńizshevroilǵa" qarasty merdiger kompaniialardyń birinde jumys istegen. Vaternas jumysshylar poselkasynda turǵan. Qazir infektsiialyq izoliatorǵa jatqyzylǵan.
Resmi organdar "koronavirýs "Teńizshevroil" kompaniiasynyń jumysyna áser etpeidi dep málimdedi. Aqparat boiynsha, kompaniia "qyzmetkerlerin virýstan qorǵaý qorǵaný sharalaryn uiymdastyrǵan".
Sońǵy málimet boiynsha, Qazaqstanda 709 naýqas bar. 7 adam koronavirýstan qaitys bolǵan. 51 adam jazylǵan. Mańǵystaý oblysynda - 6, Atyraý oblysynda 36 adamǵa virýs juqqan.
