Tanymal akter Táýekel Músilim otbasyndaǵy qarym-qatynas, bala tárbiesi jáne ata-ananyń erli-zaiyptylar ómirine aralasýy týraly pikir bildirdi, dep habarlaidy ult.kz.

Óner iesi suhbat barysynda ár otbasynyń óz shekarasy bolýy kerektigin aitty. Onyń pikirinshe, ata-ana balalaryna aqyl-keńes bergenimen, olardyń jeke ómirine jáne bala tárbiesine qatysty sheshimderine aralaspaǵany jón.

Akter bul ustanymyn óz otbasynda da saqtaýǵa tyrysatynyn jetkizdi. Aitýynsha, keide anasy nemereleriniń tym erke bolyp ósip jatqanyn aityp, eskertý jasaidy. Alaida Táýekel Músilim qazirgi balalardy burynǵy ádispen tárbieleý durys emes dep esepteidi.

“Men anama únemi jumsaq jetkizýge tyrysamyn. Anam balalarymnyń tárbiesine aralasyp: “Óte erke, kóp oiynshyq alyp beresiń, tym erkeletip jibergensiń” dep aityp qalady. Ondaida: “Mama, senderdiń kezińdegi tárbie qazir júrmeidi” deimin”, – dedi akter.

Sonymen qatar óner iesi bolashaqta óz balalary otbasyn qurǵan kezde olardyń jeke ómirine aralaspaýǵa nietti ekenin aitty. Bul máseleni jubaiymen de aldyn ala talqylaitynyn jasyrmady.

“Qazirdiń ózinde áielime de: “Erteń uldarymyz erjetip úilenedi, árqaisysynyń óz otbasy bolady. Sol kezde aralaspaiyqshy” dep eskertip otyramyn”, – dep bólisti Táýekel Músilim.

Aita keteiik, Táýekel Músilim Janar Duǵalovamen qandai bailanysy baryn aitty.  

Táýekel Músilim kim?

Táýekel Músilim – qazaqstandyq tanymal akter, telejúrgizýshi jáne model. Ol 1988 jyly 9 jeltoqsanda Almaty qalasynda dúniege kelgen. Bolashaq akter Almatydaǵy №140 mektep-gimnaziiasynda bilim alǵan. Keiin Qanysh Sátbaev atyndaǵy Qazaq ulttyq tehnikalyq ýniversitetin mashina jasaý mamandyǵy boiynsha támamdaǵan. Negizgi mamandyǵy injener-mehanik bolǵanymen, eńbek jolyn óner salasymen bailanystyrdy.

Táýekel Músilim shyǵarmashylyq jolyn modeldik biznesten bastaǵan. Keiin jarnamalyq rolikter men mýzykalyq beinebaiandarǵa túsip, kópshilikke tanyla bastady. Akter retinde tanylýyna 2014 jyly jaryq kórgen “Mahabbatym júregimde” telehikaiasy yqpal etti. Bul jobada ol basty rólderdiń birin somdady. Keiin “Aǵa ma, álde neke me?”, “Anamdy izdeimin”, “Qazaq arýy”, “Svadba.kz” jáne “Masha men Dýdarai” sekildi filmderge tústi. Sonymen qatar “Habar” telearnasyndaǵy “Jańa kún” baǵdarlamasynyń júrgizýshisi retinde de eńbek etti.

Óner iesi shyǵarmashylyq qyzmetimen qatar otbasylyq ómiri týraly da suhbattar berip turady. Ol bala tárbiesi, ata-ana men balanyń qarym-qatynasy jáne otbasyndaǵy jaýapkershilik máselelerine qatysty kózqarasyn kópshilikpen bólisip keledi.