Almatynyń Naýryzbai aýdanynda aýmaǵy 1 gektar bolatyn jańa qoǵamdyq keńistik qurylyp jatyr.
Saiabaq otbasylyq demalysqa, serýendeýge jáne túrli jastaǵy turǵyndardyń bos ýaqytyn ótkizýine arnalǵan. Ol Alem park attraktsiondar saiabaǵynyń janynda ornalasqan.
Jańa demalys aimaǵyn qurý týraly Naýryzbai aýdanynyń ákimi Nazira Toǵyzbaeva Óńirlik kommýnikatsiialar qyzmetiniń brifinginde málimdedi.
Jobada kógaldandyrýǵa erekshe kóńil bólingen. Saiabaq aýmaǵyna 200 iri kólemdi aǵash, 85 qylqan japyraqty aǵash, shamamen 30 myń buta, sondai-aq 1,5 myń raýshan gúli otyrǵyzyldy.
Turǵyndarǵa qolaily bolýy úshin jaiaý júrginshiler joldary, oryndyqtar jáne jaryqtandyrý júiesi qarastyrylǵan. Jasyl jelekterdiń jai-kúiin turaqty kútip ustaý avtomattandyrylǵan sýarý júiesi arqyly qamtamasyz etiledi.
Jańa demalys aimaǵynda fontan, «Otbasy» kompozitsiiasy, pergolalar jáne balalar oiyn alańy da bar. Osylaisha, keńistik otbasylyq demalysqa, serýendeýge jáne tynysh ýaqyt ótkizýge arnalǵan.
Jobany iske asyrý Naýryzbai aýdanynda turǵyndar úshin abattandyrylǵan qosymsha demalys aimaǵyn qurýǵa jáne kógaldandyrylǵan qoǵamdyq keńistikterdiń sanyn arttyrýǵa múmkindik beredi.
Qazirgi ýaqytta saiabaqty qurý jumystary aiaqtalýǵa jaqyn. Jańa demalys aimaǵyn turǵyndar úshin jaqyn arada ashý josparlanyp otyr.
