Foto: inbusiness.kz
Mańǵystaý oblysy Jańaózen qalasynda arbaǵa tańylǵan múgedektigi bar jigitke kúsh kórsetip, qorlaǵan degen kúdikpen qoǵam belsendisi ustaldy. Oqiǵa týraly 31-arnanyń “Informbiýro” baǵdarlamasy habarlady.
Qazirgi ýaqytta kúdikti tártip saqshylarynyń baqylaýynda, oqiǵaǵa qatysty tergeý júrip jatyr.
Jelide taraǵan videoda er adamnyń bólme ishinde bir áielmen janjaldasyp jatqanyn kórýge bolady. Artynsha ashýǵa býlyqqan ol arbadaǵy jigitti tósekke jatqyzyp, birneshe ret betinen shapalaqpen urǵan. Ózin qorǵai almaǵan jábirlenýshi aiqailap, qarsylyq kórsetýge tyrysqanymen, shamasy jetpegen. Keiin de oǵan qysym kórsetilgeni baiqalady.
Kúdiktiniń seksýaldyq sipattaǵy zorlyq áreketterine barǵan-barmaǵany ázirge belgisiz. Quzyrly organdar barlyq mán-jaidy anyqtap jatyr.
Aita keteiik, buǵan deiin Qaraǵandyda múgedektigi bar azamatty qaiyr suraýǵa májbúrlegen jaǵdai qoǵamda rezonans týdyrǵan bolatyn. Tergeý barysynda onyń kúndelikti tapqan tabysyn buryn sottalǵan adam iemdenip otyrǵany belgili bolǵan.
