videodan alynǵan kadr
Jańaózen qalasynyń ákimi Aibek Qosýaqov alańǵa jinalǵan turǵyndarǵa úndeý jasady, dep habarlaidy "Ult aqparat" Mańǵystaý oblysy ákimdiginiń baspasóz qyzmetine silteme jasap.
"Búgin, 11 sáýirde Jańaózen qalasynyń ákimdigi aldyndaǵy alańǵa jinalǵan Jańaózen qalasynyń turǵyndaryna túsindirme jumystary júrgizildi. Sondai-aq, qala ákimi jinalǵandarǵa beine ótinish jasady" - delingen habarlamada.
"Qurmetti Jańaózen qalasynyń turǵyndary, qadirli jerlester!
Búgin barlyǵyńyz áleýmettik jeliden jerlesterimizdiń Astana qalasynda narazylyq aktsiiasyn uiymdastyryp, politsiia bólimine jetkizilgeni týraly aqparatty kórip otyrsyzdar.
Quqyq qorǵaý organdary ókilderiniń aitýynsha, jerlesterimizdiń jaǵdaiy jaqsy. Olarǵa qoldanystaǵy zańnama sheńberinde ákimshilik sharalar qabyldanatyn bolady.
Ákimdik turaqty negizde qala aýmaǵynda jańa jumys oryndaryn qurý, jumyssyz azamattardy turaqty jumyspen qamtamasyz etý boiynsha sharalar qabyldaýda.
Astanada narazylyq bildirgen azamattarmen aldyn ala kelissózder júrgizildi. Buryn tenderden jeńilgen kompaniiada jumys istegenderge eńbek jaǵdailary men jalaqylaryn saqtai otyryp, tenderdi jeńip alǵan kompaniiaǵa aýysý usynyldy. Biraq usynys qabyldanbady.
Qasietti Ramazan aiynda men barshańyzdy sabyrlyqqa shaqyramyn! Máseleniń mánin bilmei, emotsiialarǵa berilmeýlerińizdi jáne arandatýshylardyń sózine erip, qandai da bir zańsyz áreketterge barmaýlaryńyzdy suraimyn!" - dedi Aibek Qosýaqov.
Aita keteiik, turaqty jumys talap etip, Astanadaǵy Energetika ministrligi ǵimaratynyń aldynda narazylyq bildirgen jańaózendik munaishylardy 11 sáýirde keshkisin politsiia men arnaiy jasaq kúshtep ustap áketti.
Keiin "BerÁli Mańǵystaý Company" kásiporny jumysshylarynyń ókilderi Jolmurat Ulyqpanov pen Nursultan Nurymuly úndeý jasap, Jańaózendegi qoldaýshylaryn zańsyz áreketke barmaýǵa jáne úilerine qaitýǵa shaqyrdy.
