Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine turǵyn úi baǵdarlamalary operatorlarynyń sanyn qysqartý máseleleri boiynsha ózgerister men tolyqtyrýlar engizý týraly» zań jobasy ekinshi oqylymda maquldandy, dep habarlaidy QazAqparat.
Zań jobasy Qazaqstan Prezidenti Qasym-Jomart Toqaevtyń tapsyrmasyn iske asyrý maqsatynda Parlament depýtattary bastamashylyǵymen ázirlendi.
«Osy zań jobasy 2020 jylǵy 8 sáýirde birinshi oqylymda maquldandy. Talqylaý kezinde atap ótilgendei, turǵyn úi baǵdarlamalarynyń jumys istep turǵan úsh operatoryn Turǵyn úi qurylysynyń biryńǵai operatory etip biriktirýge, sondai-aq olardyń qaitalanatyn fýnktsiialaryn joiýǵa jáne jalpy ákimshilik shyǵystaryn qysqartýǵa baǵyttalǵan», - dedi Májilis depýtaty Sapar Ahmetov.
Zań jobasynda Turǵyn úi qurylysynyń biryńǵai operatorynyń kelesi normalary engizilgen: ipotekalyq turǵyn úi qaryzdaryna kepildik berý, úleskerlerdiń quqyqtaryn qorǵaý tetigin qoldaný arqyly kóppáterli turǵyn úidiń qurylysyn aiaqtaýǵa kepildikter berý, investitsiialyq jobalardy qarjylandyrý men iske asyrý jónindegi qyzmetterin reglamentteý.
Eske sala keteiik, biyl sáýir aiynda Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine turǵyn úi baǵdarlamalary operatorlarynyń sanyn qysqartý máseleleri boiynsha ózgerister men tolyqtyrýlar engizý týraly» zań jobasy birinshi oqylymda maquldanǵan bolatyn.
Zań jobasy turǵyn úi baǵdarlamalarynyń jumys istep turǵan operatorlary «Qazaqstan ipotekalyq kompaniiasy» AQ-ny, «Báiterek development» AQ men «Turǵyn úi qurylysyna kepildik berý qory» AQ-ny Turǵyn úi qurylysynyń biryńǵai operatory etip biriktirýge baǵyttalǵan.
