Búgin - 2016 jyldyń sońǵy kúni. Sanaýly saǵattardan keiin meshin jylyna da qosh aitamyz. Alda taýyq jyly tosady. Osy oraida jańa jylǵa qatysty qylqalam ieleriniń óleń-jyrlaryn toptastyrýdy jón kórgen edik. Óleń oqiyq!
***
Jańa jyl túni
«Alaqai, búgin Jańa jyl keledi,
Jańa jyldy kútetin tún keledi».
Jurttyń bári birtúrli qýanyshty,
Keýdelerin osy oi kep úrlegeli.
Aýyrtpalyq jinalyp... ketetindei,
Jylmen birge bir baqyt jetetindei.
Aspan jaqtan nur saýlap túni boiy,
Erteń dúnie ózgerip ketetindei.
E, Alla, kezek kelip, Ai, Kún aman,
Jaqsylyqqa dastarhan jaidyr ámán.
— Aiaz ata keledi! — dep qyzym máz,
— Bilem, ol — Oral aǵa... — deidi balam.
Máz bolyp qonaqtyń kóp kelgenine,
«Jańa jyl kep jaiǵasty tórge, mine,
Tek qar joq. Jańbyr jaýyp...» — deidi áielim,
...E, shúkir, ol da Allanyń bergeni de.
Jańa jyldyń tańy atty...
Lezde tipti,
(Shúkir, tańnyń atqanyn kóz kóripti).
... Baiaǵy tań.
Tirshilik sol baiaǵy...
Iá, aitpaqshy, kúntizbe ózgeripti:
1 qańtar 2010 jyl.
Baýyrjan Babajanuly
***
Jańa jyl túni
Aq juldyzdar toilap,
Aq aspanda oinap
Asyǵady jerge,
Jaralǵandai ardan,
Aq kóbelek arman.
Qyrdan qyrǵa zýlap,
Sábiler júr shýlap,
Jarysyp pák jelmen.
Peiilge nur seýip,
Shańǵylaryn teýip.
Shatyqqa án qosyp,
Alaqanyn tosyp,
Shyrshalar tur áne,
Meiirim syilap miǵa,
Kókten qonǵan syiǵa.
Syimaituǵyn sózge,
Kórinbeitin kózge.
Tek Allaǵa aian,
Aq álemde jaryq
Baqyt bary anyq.
... Jańa jyldyń kúni,
Jańa úmittiń tini.
Sol bir baqyt kirsin,
Búgin árbir úige –
Jyrylmaǵan kúide.
Maraltai Raiymbekuly
***
Klaýsofobiia. Jańa jyl - 2016
Jana jyldy qarsy almaimyn biyl men,
Jylqydaimyn qalyp qoiǵan úiirden...
Qarap turmyn, aiap turmyn birtúrli
Shyrshalardy qabaqtary túiilgen.
Jańa jyldy toilaýdan da jalyqqam,
Jańa jyldy oilaýdan da jalyqqam.
Men ol túgil, tórt jylda bir keletin,
Dúbirletken sailaýdan da jalyqqam...
Adamdar-ai, armany kóp, armany,
Aman bolsaq, bola jatar qalǵany.
Eń bastysy, osy ótken jyl úshin,
Eshbir jannan uialmasaq bolǵany...
Eski jylda neden qaldyq, keshtettik,
Qai jerinde qatelestik, esh kettik?
Jaqsy nárse jazaiyqshy...
Jańa jyl -
Jańa kitap 365 bettik...
Oqyǵym kep jurtqa osy óleńdi,
Bir alapat kúsh býyp tur denemdi.
Bul Jańa jyl - balalardyń meiramy,
Keshirińiz, bala emespin men endi...
Shyrsha deimin... shyrshalardy aitam da,
Jarty aidan soń qalady ólip qai saida?!
Neni oilaidy, óz tilinde ne deidi-ai,
Bu dúniiadan o dúniiaǵa qaitarda...
Baltalaǵan adamdardy qarǵai ma?
Bilmeimin ǵoi, bola ma eken ondai da?!
So kisiler JaHannamnyń otynda,
Shytyr-shutyr shyrshadai bop janbai ma?!
Ózi bilsin, túsinse de kim qalai,
(Ákem oqyp qoisa, taǵy ursa ma-ai?).
Jurt toilap júr, al men turmyn sostiyp,
Ne óli emes, ne tiri emes shyrshadai...
Aiaq asty bosap ketti-aý kóńilim,
Ýa, Táńir-ai, qartaidym ba, ne bunym?
Shyńǵyrady iship alyp bireýler,
Shyr ainalyp shyrsha-qyzdyń óligin...
Ot-shashýlar... ottaryndai tozaqtyń,
Alas, alas, Alty Alashtan azap-muń.
Jek kóre me Jańa jyldy shyrshalar,
Jete almaǵan Naýryzyna qazaqtyń?!
Kún jylynsa, shyqsam anaý kók belge,
Tek sol ǵana, basqa tilek joq mende.
...Shyrsha egemin, tal egemin Naýryzda,
Qansha kún bar oǵan deiin... Kóktemge?!
Eeeh, Naýryz...
01.01.16 jyl.
Almas Temirbai
Toptastyrǵan: Ult portaly
