Áleýmettik jelide jazýshy ári zertteýshi Gúlsim Orazalyqyzynyń Sanjar Kerimbaiǵa qatysty aitqan syny qyzý talqylanyp jatyr, dep habarlaidy ult.kz.

Zertteýshi birneshe kitaptyń avtory retinde tanylǵan Sanjar Kerimbaidy Nurtas Ońdasynov týraly eńbeginde ózge zertteýlerdegi materialdardy paidalanǵan dep aiyptady.

Gúlsim Orazalyqyzy Nurtas Ońdasynovtyń ómiri men qoǵamdyq qyzmetin uzaq jyl zerttep, osy taqyrypta úsh kitap shyǵarǵanyn atap ótken. Onyń aitýynsha, Sanjar Kerimbaidyń “Nurtas jáne elge qyzmet” atty eńbeginde derbes zertteý, jańa ǵylymi tujyrym nemese tyń arhivtik derek az.

Zertteýshiniń sózinshe, kitaptaǵy birqatar málimet buryn jaryq kórgen eńbekterden, sonyń ishinde óziniń zertteýlerinen alynǵan.

Ol ásirese Nurtas Ońdasynovqa qatysty ómirbaiandyq derekter, tarihi málimetter men keibir tujyrymdardyń buǵan deiin jariialanǵan kitaptarmen uqsastyǵyna nazar aýdarǵan. Osyǵan bailanysty zertteýshi eńbek avtorynyń derekkózderdi paidalaný tártibine qatysty suraq kóterip otyr.

Avtor ne deidi? 

Sanjar Kerimbai bul aiypqa dereý jaýap berdi. Ol kitapta paidalanylǵan ádebietterdi kimnen alǵanyn ashyq jazǵanyn aitty. Tipti, Gúlsim Orazalyqyzyna alǵys aitqanyn da tilge tiek etti.

“NURTAS jáne ELGE QYZMET atty kitabymyz jaryqqa shyqpai jatyp daýǵa shatylǵandai kóringen. Kitapty alyp oqyp kórmegen janǵa álbette ol daý, á degende túsiniksiz kórinip, adamdy ári-sári kúige salady. Jýrnalister jekeme habarlasyp mán-jaidy surady. Jaýap berdim. Túsinikti, aǵa - dedi de olar meniń jaýabymdy jańalyqqa shyǵardy. Daýlasýǵa, janjaldasýǵa eshqandai da obektivti sebep joq. Bári norma. Avtorlar akademiialyq ádildikten attamaǵan. Derek kózderi men derek jetkizýshi kisilerdiń atyn atap, eńbegin baǵalap jazǵan. Eshnársege alańdamai Nurtas jaily kitapty kaspiden satyp alyńyz da raqattanyp oqi berińiz”, - dep jazdy ol. 
 

Aita keteiik, Jýrnalist Ardaq Qultai tikelei efirde Sanjar Kerimbaiǵa habarlasyp, qoǵam belsendisiniń kitabyndaǵy jazbany talqylady. 

Sanjar Kerimbai kim? 

Sanjar Kerimbai - qazaqstandyq shyǵystanýshy, jazýshy jáne zertteýshi. Ol logoterapiia taqyrybyn qazaq tilinde nasihattap júrgen avtorlardyń biri retinde tanylǵan. Ádebiet portalynda ony “logoterapiia ǵylymyn zertteýshi” dep sipattaidy.

Ol birneshe kitaptyń avtory jáne birqatar eńbekti basqa avtorlarmen birlesip jazǵan. Solardyń qatarynda “Logoterapiia”, “Mahabbattyń máni”, “Beisen bolmys” kitaptary bar. Sondai-aq Sanjar Kerimbai men Ádilbek Nábi “Ózbekáli jáne mádeni maidan” eńbegin jazǵan.

Sanjar Kerimbaidyń shyǵarmalarynda adamnyń ómir máni, rýhaniiat, tulǵalyq damý, qazaq tarihy men mádenietine qatysty taqyryptar jii kóteriledi. “Ózbekáli jáne mádeni maidan” kitabyn jazý kezinde ol Ózbekáli Jánibekov týraly adamdarmen kezdesip, kitaphanadaǵy derekterdi zerttegenin aitqan.