9 qarashada elimizde «Jańa jaǵdaidaǵy jastar: is-qimyl kezeńi» respýblikalyq onlain jastar jobasy iske qosylady. Bul týraly QR Aqparat jáne qoǵamdyq damý ministrliginiń jastar jáne otbasy isteri komitetiniń tóraǵasy Shahmardan Baimanov málim etti, dep habarlaidy QazAqparat.
«Prezident tapsyrmasyna sáikes jastardyń tsifrlyq jáne kásiptik bilim deńgeiin arttyrý, sporttyq-shyǵarmashylyq áleýetin damytý máselelerin nazarǵa alyp otyrmyz. Osy maqsatta 9 qarasha men 8 jeltoqsan aralyǵynda QR Aqparat jáne qoǵamdyq damý ministrliginiń qoldaýymen «Qazaqstan jastarynyń kongresi» ZTB uiymdastyrýymen «Jańa jaǵdaidaǵy jastar: is-qimyl kezeńi» respýblikalyq onlain jastar jobasyn júzege asyrý josparlanyp otyr. Bul jobanyń negizgi maqsaty – jastardy jańa bolmys jaǵdaiynda biriktirý, ziiatkerlik qabileti men tulǵalyq kapitalyn damytý, sonymen qatar daǵdylaryn shyńdaýǵa, jańa qyrlaryn ashýǵa, kásipkerlik, volonterlik qyzmetin damytý úshin jaǵdai jasaý», - dedi Shahmardan Baimanov OKQ-da ótken baspasóz máslihatynda.
Onyń aitýynsha, biyl bul baǵyttaǵy onlain sharalardyń birshamasyn onlain formatta ótkizý josparlanǵan.
«Sondyqtan qazirgi kúrdeli jaǵdaidy eskere kele respýblikalyq onlain jastar jobasyn júzege asyrýdy jón dep sanadyq», - dedi ol.
Komitet basshysy «Jańa jaǵdaidaǵy jastar: is-qimyl kezeńi» respýblikalyq jobasy dástúrli shara ekenin eske saldy.
«2018 jyly «Zerendi» respýblikalyq bilim lagerinde joba uiymdastyrylǵan. Sodan beri úshinshi ret ótkizilgeli otyr. Jobaǵa úsh jyldyń kóleminde belsendi jastar qatysqan», - dedi ol.
.jpeg)