15 naýryzda Jańa Zelandiiadaǵy eki meshitke jasalǵan shabýyldan 49 adam qaza taýyp, 20 adam jaralandy. Bul týraly eldiń premer-ministri Djasinda Arden habarlady.
Premer Arden bul oqiǵany "terakt" dep atady.
Shabýyl Kraistcherch qalasynyń ortasyndaǵy Ál-Nur meshiti men shahar irgesindegi meshitke jasalǵan. Ál-Nurda – 30, Linvýdtegi meshitte 10 adam qaza tapqan.
Kúdiktiniń biri meshittegi adamdar namaz oqyp jatqanda kirip kelgen. "Qolynda úlken tapansha boldy. Kirdi de adamdarǵa shetinen ata berdi" deidi shabýyl kezinde qashyp úlgergen Ahmad ál-Mahmýd esimdi azamat.
Jańa Zelandiia Premer-ministriniń aitýynsha, kúdikti retinde qamaýǵa alynǵan tórt adam estremistik kózqarasta bolǵan, biraq politsiia esebine alynbaǵan.
Avstraliia premer-ministri Skott Morrison ustalǵandardyń biri - Brenton Tarrant esimdi avstraliialyq azamat ekenin rastady. Shabýyldy moinyna alǵan azamat manifestinde ózin "28 jastaǵy aq avstraliialyq" dep atap, "Jańa Zelandiiaǵa shabýyldy uiymdastyrý úshin ǵana kelgenin" aitqan.
The New Zealand Herald málimetinshe, 28 jastaǵy Tarrant atys bastalardan buryn jáne oqiǵa ústinde 17 minýt boiy áleýmettik jelide tikelei efir júrgizgen. Odan buryn "manifest" jariialapty. Terakt uiymdastyrdy degen kúdiktiniń Twitter jelisindegi paraqshasy buǵattalǵan.
Premer-ministri Djasinda Ardern "Mundai jaǵdai buryn-sońdy bolǵan emes. Búgin – el tarihyndaǵy eń qaiǵyly kúnderdiń biri" dep málimdedi.
Aita keteiik, budan buryn 27 adamnyń qurbany bolǵany habarlanǵan edi, keiin olardyń sany 40-qa jetip, al sońǵy derekter boiynsha, 49 adam terroristerdiń qolynan ajal qushypty. Sonymen birge 48 qala turǵyny zardap shekken.
