Búgin Enbek.kz elektrondy eńbek birjasynyń platformasynda iske qosylǵan Memlekettik áleýmettik saqtandyrý qorynan tólem alýǵa ótinish berý servisi arqyly bir ýaqytta 25 myńǵa deiin ótinish óńdeledi. Bul jóninde Eńbek jáne halyqty áleýmettik qorǵaý ministrligi habarlady.
42500.enbek.kz servisine azamattardan tym kóp shaǵym túsýine bailanysty málimetterdi bir ýaqytta óńdeýge 25 myń ótinishke deiin sandyq shekteý qoiyldy. Bul servis buzylmas úshin jasalady.
«Azamattardan shydamdylyq pen túsinistik tanytýlaryńyzdy suraimyz. Eger birinshi áreketten ótinish berý múmkin bolmasa, ony qaitalaý qajet. Qazirgi ýaqytta servis arqyly bekitilgen 6 sanattyń 5-eýi áleýmettik tólem alýǵa ótinish bere alady. Jaqyn arada mundai múmkindik biryńǵai jiyntyq tólemdi tóleýshilerge da beriledi» dep málim etti ministrlikten.
Feik resýrstardyń paida bolýyna bailanysty saittyń durys mekenjaiyn jariialaimyz - 42500.enbek.kz.
Budan buryn habarlanǵandai, MÁSQ-tan eń tómengi jalaqy – 42 500 teńge mólsherindegi tólemge ótinish berý úshin kelesi qadamdardy oryndaý qajet:
1) 42500.enbek.kz saityna kirińiz;
2) «42 500 járdemaqy alý» tańdańyz;
3) ótinish berýshiniń aty-jóni, JSN, IBAN nemese jumys berýshiniń BSN, elektrondy poshta kórsetilgen nysandy (forma) toltyryńyz;
4) nysandy (forma) jiberý kerek;
5) júie telefon nómirin suraidy;
6) telefon nómirin SMS arqyly jiberilgen kodpen rastaý;
7) ótinish jiberildi.
«Azamattarǵa arnalǵan úkimet» memlekettik korporatsiiasy» KEAQ-ta ótinish óńdelip, derekter tekserilgennen keiin, ótinish berýshi qabyldanǵan sheshim týraly SMS-habarlama alady, aqparat tólemdi taǵaiyndaý jáne tóleý úshin MÁSQ-qa jiberiledi.
Esterińizge sala keteiik, tótenshe jaǵdailar kezinde tabysynan aiyrylý jaǵdaiyna bailanysty MÁSQ-tan áleýmettik tólem kelesi sanattaǵy azamattarǵa taǵaiyndalady:
- orta, shaǵyn jáne mikrobiznes sýbektileriniń qyzmetkerleri;
- jeke kásipkerler;
- jeke praktikamen ainalysatyn adamdar (notariýs, jeke sot oryndaýshysy, advokat, kásibi mediator);
- biryńǵai jiyntyq tólemdi tóleýshiler;
- nysanasy jumystardy oryndaý (qyzmetter kórsetý) bolyp tabylatyn azamattyq-quqyqtyq sipattaǵy sharttar boiynsha tabys tabatyn, salyq agentteri olar úshin mindetti zeinetaqy jarnalaryn aýdarǵan adamdar;
- karantin engizilgen eldi mekenderdegi iri biznes sýbektileriniń qyzmetkerleri.
Ótinimderdi qarastyrýdyń jáne áleýmettik tólemderdi taǵaiyndaýdyń jalpy merzimi – 3 jumys kúni.
