Jaqynda laýazymdy qyzmetke taǵaiyndalǵan aitysker aqyn Rinat Zaiytov suqbat berip, jańa qyzmetine qatysty oiyn aitty, dep habarlaidy Sputnik Qazaqstan.
"Ujymdy basqarý – ujymmen til tabysý. Sosyn jaýapkershilikti moinyńa alý. Men áý bastan jaýapkershilik alýdan qashqan joqpyn. Ózim aitqan sózim úshin de, istegen isim úshin de. Dál sondai jaýapkershilik moinyma resmi túrde júkteldi", – dep túsindirdi jańa qyzmetin aitysker aqyn.
Aitýynsha, jańa qyzmetindegi ailyǵy shamamen 200 myń teńge. Al ózi direktor bolǵan óner ordasynyń jyldyq biýdjeti 17-18 million teńge.
"Eń birinshi eden jýýshylarmen sóilestim. Olardyń naqty ailyǵyn bilemin. Eń kóbi – 56 myń teńge. Ol jerde jumys isteitin ánshi-ártistiń ailyǵy 100 myń teńgeden aspaidy. Onyń syrtynda Almaty qalasynyń ákimdiginiń tapsyrmasy bar: "Rinat, ulttyq óner aqsap barady. Myna jaqty retteý kerek. Aiǵailaǵanda adalmyn deisiń ǵoi, istep kór" dep usynys aitty", – deidi aitysker.
Suqbat barysynda ázirge "Úsh júzdiń taǵdyrynan úsh qyzdyń taǵdyry artyq bolyp tur" degen syndy sóz aitpaitynyn jetkizdi.
"Ázirge aitpaimyn. Qyzmettik etika degen bar. Ol avtomatty túrde keletin kompromiss. Qyzmetke baramyn dep kelisim beretin kezde olar maǵan "aitpaisyń, úndemeisiń" degen joq. Ózime-ózim shekteý qoiatynymdy ishtei bildim. Jalpyulttyq máselelerde oidy ashyq bildirýge eshkim toqtaý salǵan joq. Biraq burynǵydai otyryp alyp, keshke deiin ura bermeimin. Oǵan ýaqytym da joq, ekinshiden, meniń túsinigimde uiatsyzdaý bolady", – dedi Zaiytov.
Rinat Zaiytov "oqqaǵaryńyz bar ma?" degen suraqqa tańdanyspen jaýap berdi.
"Kim ataiyn dep júr meni? Atqysy kelgen adam oqqaǵarǵa qaramaidy ǵoi", – dedi Zaiytov.
Áńgime barysynda Rinat Zaiytov Dimash Qudaibergenniń Amerikaǵa kóshkeli jatqanyna qatysty oiyn aitty.
"Dáp sol balada endi sharýam joq. Qazaq ekige bólinedi: meni jaqtaityndar jáne ony jaqtaityndar. Sharshadym ondaidan. Bos áńgime… Qazaqty yryldastyrýdan sharshadym. Qazaqtyń basyn qosqym keledi", – dedi ol.
Aita keteiik, 8 aqpanda Rinat Zaiytov Almatydaǵy "Alataý" dástúrli óner teatrynyń direktory bolyp taǵaiyndaldy.
Ol 1983 jyly 17 qarashada Shyǵys Qazaqstan oblysynyń Aiagóz qalasynda dúniege kelgen. Muqan Tólebaev atyndaǵy mýzyka kolledjin "Dramalyq teatr akteri" mamandyǵy boiynsha támamdaǵan. Diplom alǵannan keiin Semeidegi memlekettik pedagogikalyq institýtqa oqýǵa túsedi. Osylaisha qazaq tili men ádebieti pániniń oqytýshysy bolady.
Aitysqa 17 jasynan aralasa bastaǵan. Semeidegi jastar teatrynda qyzmet etti. Aimaqtyq, respýblikalyq jáne halyqaralyq aitystardyń jeńimpazy.
