Búginde qazaq qoǵamynda Memleket basshysy jariia etken «Jańa Qazaqstan» tujyrymdamasy qyzý talqylaný ústinde. Búginde Ortalyq kommýnikatsiialar qyzmetinde bas qosqan elimizge esimi tanymal sarapshylar, saiasattanýshylar, úkimettiń emes uiymdardyń jetekshileri dál osy taqyryp tóńireginde sóz qozǵap, óz oilarymen egjei-tegjeili bólisti, dep habarlaidy QazAqparat.
Is-shara barysynda QR AQDM Azamattyq qoǵam isteri komitetiniń tóraǵasy Madiiar Qojahmet qańtar oqiǵalarynan keiin azamattyq qoǵam men memleket arasyndaǵy jańa qoǵamdyq kelisimge, azamattyq qoǵammen bailanys máselesine qatysty kóptegen talqylaý júrip jatqanyn atap ótti.
«Qazirgi ýaqytta qoǵamdyq bailanystyń birneshe túri bar. «Halyq únine qulaq asatyn memleket» tujyrymdamasy aiasynda kóptegen is-shara iske asyrylyp jatyr. Onyń ishinde qoǵamdyq keńester jumysy da bar. Sonymen qatar 2 jyl buryn qabyldaǵan beibit sherýlerge qatysty zań, basqa da is-sharalar iske asqany. Degenmen bul jumystardyń qajetti deńgeide durys nemese nátijeli emes ekendigin osydan 1 ai buryn bolǵan qańtar oqiǵalary dáleldep berdi. Sondyqtan bul salany damytý óte ózekti bolyp otyr. Aqparat jáne qoǵamdyq damý ministrligi bul baǵyttaǵy jumysyn ary qarai jalǵastyrady. Onyń ishinde kelip jatqan kóptegen usynysty júielendirip, ony úlken qujat retinde qabyldaý ári iske asyrý negizgi máselelerdiń biri», - dedi komitet tóraǵasy.
Al «Rýhani jańǵyrý» qazaqstandyq qoǵamdyq damý institýtynyń basqarma tóraǵasy Qazybek Maigeldinov qańtar oqiǵalarynan sabaq alýymyz qajettigin aitady.
«Qaraly qańtar oqiǵasynyń basty mańyzy – bul meje. Iaǵni, buǵan deiin bolǵan qandai da bir saiasi qatelikter, bilik qatelikteri bizge sabaq bolyp qalady. Endi osy sabaqty eskere otyryp, «Jańa Qazaqstan» qurýǵa kirisýimiz qajet. Qazir qańtar oqiǵalaryna qatysty baǵa berý kóbeiip tur. Menińshe, baǵa berýge áli erte. Biraq, sabaq alýymyz qajet», - dedi ol.
Sonymen qatar ol Prezidenttiń sol kezde shuǵyl sheshim qabyldaýy qajet bolǵandyǵyn basa aitady.
«Óitkeni, bizdiń saiasi turaqtylyǵymyzdan bólek memlekettigimizge úlken nuqsan keletin edi. Mysaly, beibit zamanda 200-den astam adamnyń ólimi - úlken qasiret. Buǵan qosa, qansha ǵimarat órtenip, bizneske shyǵyn keltirdi. Onyń bárin kim istedi? Beibit sherýshiler me? Joq. Bul suraqqa tikelei jaýap berýimiz kerek. Ár buzaqylyqtyń, ár qylmystyń artynda oǵan kináli adamdar turady. Sondyqtan Prezident aitqandai, bul kináli adamdardy taýyp, kim ekenin anyqtaý úshin ýaqyt kerek. 1-2 ai az ýaqyt. Biz ádilet izdep júrip, ádiletsizdikke boi aldyrmaýyz qajet. Kinásizdik prezýmptsiiasy degen bar. Kez kelgen adamdy aiyptaý úshin naqty dáiek, dálel bolýy tiis. Sol kezde ǵana ol aiyptalýshydan aiyptyǵa ainalady. Sondyqtan asyqpaýymyz qajet»,- dedi Qazybek Mageldinov.
Spiker elimizde partiialar kóp bolýy tiis deitinderdiń oilaryna qatysty da pikirin bildirdi.
«Kórshiles Qyrǵyzstanǵa qarańyzdar. Olarda 200-den astam partiia bar. Al 200-den astam partiia bola tura Qyrǵyzstannyń saiasi turaqtylyǵy jaiynda aita alamyz ba? Joq. Biz ár nársege salystyrmaly túrde qaraýymyz kerek. Majoritarlyq-proportsionaldy júie qajet shyǵar. Oǵan suranys bar. Ásirese, jergilikti atqarýshy organdardy sailaý kerek. Keshegi qańtar oqiǵasynda kóptegen ákimder halyq aldyna shyqqan joq. Shyqqannyń ózinde ákimderge syilastyq bolmady. Nege? Óitkeni, olardy halyq sailamady. Ekinshiden, ákimniń halyq aldyndaǵy jaýapkershiligi men mindeti bolǵan joq», - dedi sarapshy.
Prezidenttik jastar kadrlyq rezerviniń múshesi, Jastar ǵylymi-zertteý ortalyǵy direktorynyń orynbasary Elina Paýli «Jańa Qazaqstan» degenimiz - qoǵamdyq institýttar men úkimettik emes uiymdardyń azamattyq qoǵam qurýdaǵy batyl bastamalarynyń júzege asýy ekendigin alǵa tartady.
«Memleket basshysy Qasym-Jomart Toqaev 11 qańtarda Májiliste sóilgen sózinde «Jańa Qazaqstan» qurýǵa úndegen bolatyn. Bul degenimiz memlekettik apparattyń tolyq jańarýy nemese el ekonomikasynyń qaita túrlenýi ǵana emes. Bul - birinshi kezekte qoǵamdyq transformatsiia. Jahandaný úderisinde memleketimizdiń ózindik beinesin joǵaltpai salt-dástúr men jańashyl trendter, rýhani mádeniet pen jańa tehnologiialardyń sabaqtasyp, álem moiyndaǵan otyzdyqqa enýge nyq qadam jasai alýymyz - evoliýtsiialyq damýdyń aiqyn beinesi jáne qoǵamdyq sananyń silkinisi. «Jańa Qazaqstan» degenimiz - qoǵamdyq institýttar men úkimettik emes uiymdardyń azamattyq qoǵam qurýdaǵy batyl bastamalarynyń júzege asýy, áleýmettik qordalanǵan máselerdi aqylmen sheship, el ál-aýqatynyń edáýir joǵarylaýyn, ziiatker jastardyń tyń oilarynyń qoldaý taýyp, eldegi jańa tehnologiialyq úderisterdiń ilgerileýi. Biz osyndai memleket qurýǵa yntaly bolýymyz kerek», - dedi ol.
Elina Paýli Qazaqstan halqy 19 mln adamǵa jetkenine, onyń 3,7 mln-nan astamyn 14 pen 28 jas aralyǵyndaǵy jastar quraityndyǵyna nazar aýdartady.
«Búgingi jastardyń kózqarasyn ózgertý kerek dep oilaimyn. Osy jumysty mektepten bastaý kerek. Joǵary mekteptiń mańyzdy mindeti kásibi kadrlardy daiarlaý. Bas prokýratýra málimeti boiynsha qańtardaǵy búlikke qatysqandardyń arasynda joǵary bilimi jáne turaqty jumys orny joq 30 jasqa deiingi jastar basym boldy. Sońǵy 20 jylda eldegi NEET jastar úlesiniń kórsetkishi 18 paiyzdan 7 paiyzǵa deiin tómendedi. NEET sanatyndaǵy jastar – bul jumys istemeitin, oqymaityn jastar. Biraq, osy turǵyda áli de máseleler bar. Sońǵy 5 jylda jumyssyzdyq deńgeiiniń 4,1 paiyzdan 3,8 paiyzǵa deiin tómendegeni baiqalady. Biraq, bizdiń jastardyń arasynda jalaqysy tómen jastarymyz da bar. «Olardyń sany qansha? Olardyń ómiri qandai» degen suraqtar týyndaidy. Meniń oiymsha, tárbie, bilim berý jáne adal eńbek etý baǵyttaryn jastar arasynda damytý kerek. Búginde memleket biz úshin barlyq jaǵdai jasap otyr. Qoryta aitqanda «Jańa Qazaqstan» ziiatker urpaq, bilimdi jas, izdenimpaz jáne jasampaz azamat degen túsinikke sai bolýy tiis», - dedi ortalyq direktorynyń orynbasary.
Qazaqstan Azamattyq aliansynyń prezidenti Baný Nurǵazieva elimizdegi úkimettik emes uiymdarǵa erekshe mártebe, ózara is-qimyldyń biryńǵai platformasy, barlyq memlekettik qarjylandyrýdyń jáne ózge de qarjylyq qoldaýdyń ashyqtyǵy qajet ekendigin aitady.
«Qazaqstan Táýelsizdiginiń 30 jyly ishinde ekinshi jyl qatarynan Memleket basshysy deńgeiinde azamattyq qoǵamnyń jai-kúii jaiynda baiandama daiyndaý bolǵan emes. Jekelegen bóliktermen emes mundai tolyqqandy baiandama problemalarǵa, perspektivalarǵa jáne áleýetke qatysty sholýmen turaqty túrde jasalýy tiis. Bul halyq únine qulaq asatyn memleket ideiasyn is júzinde júzege asyrýǵa múmkindik beredi», - dedi Baný Nurǵazieva.
