Elordalyq ákimdik, SES jáne politsiia departamentiniń qyzmetkerleri saýda-oiyn-saýyq ortalyqtarynyń jańa shekteý sharalarynda qalai jumys isteitinin túsindirdi, dep habarlaidy QazAqparat.
Arnaiy top qaladaǵy birneshe saýda ortalyqtaryna baryp, qyzmetkerler men kelýshilerge elordanyń bas sanitarlyq dárigeriniń jańa qaýlysyndaǵy sanitarlyq normalar men karantin rejimin saqtaý qajettigin túsindirdi.
«Búgin biz jańa qaǵidalar boiynsha saýda-oiyn-saýyq ortalyqtarynyń daiyndyǵy men qoǵamdyq tamaqtaný nysandarynyń jumysyna monitoring júrgizemiz. Keshe Nur-Sultan qalasynyń bas sanitarlyq dárigeriniń jańa qaýlysy kúshine endi, onda saýda-oiyn-saýyq ortalyqtary jumysynyń algoritmi naqty jazylǵan. Qaýlyǵa sáikes, saýda ortalyqtary barlyq qajetti sanitarlyq-epidemiologiialyq sharalardy saqtai otyryp, jumys kúnderi saǵat 10:00-den 22:00-ge deiin jumys istei alady. Al demalys kúnderi jumys istemeidi. Iaǵni, senbi jáne jeksenbi kúnderi saýda oiyn-saýyq ortalyǵynda dárihanalar, bankterdiń esep aiyrysý-kassalyq bólimderi jáne sýpermarketteri, gipermarketteri ǵana ashyq bolady. Qazir de saýda ortalyqtarynyń birine keldik, barlyq saqtyq sharalary saqtalǵanyn kórýge bolady. Munda araqashyq saqtalyp, dúńgirshektegi, dámhanadaǵy adam sany 30%-dan aspaýy kerek», - dedi Nur-Sultan qalasy Saýda jáne qyzmet kórsetý salasyn damytý bóliminiń basshysy Rýslan Ydyrysov monitoring kezinde tilshilerge bergen suhbatynda.
Aita keteiik, saýda ortalyqtaryndaǵy kinoteatrlar tolyq rejimde jumys istep tur. Jańa qaýly kinoteatrlar jumysyna áser etken joq, olar kún saiyn saǵat 10:00-den 24:00-ge deiin jumys isteidi jáne zaldaǵy kórermender arasynda eki oryn bos qalyp, adam sany 30 paiyzdan aspaýy kerek.
Sonymen birge, saýda-oiyn-saýyq ortalyqtaryndaǵy qoǵamdyq tamaqtaný oryndary jabyq bolyp qala beredi, olar tek úige jetkizý qyzmetimen ainalysa alady. Oiyn-saýyq aimaǵy, átkenshekter men batýttar da jumys istemeidi.
Ákimdik qyzmetkerleri saýda ortalyǵy men dúńgirshekterdi aralady jáne birneshe eskertý jasady. Máselen, kofehanada kelýshiler arasynda bir ústel bos turýy kerek jáne 30 paiyzdan artyq tolmaýy kerek. Kezekke turǵanda araqashyq saqtalýy qajet. Eki saǵat saiyn ylǵaldy tazalaý jumystary júrip, satýshylar qorǵanys maskasyn aýystyryp turýy tiis. Erejege sáikes, saýda ortalyǵy ishinde kelýshiler úzdiksiz qozǵalysta ǵana júre alady jáne dálizdegi adam kóp toptasatyn oryndyqtardy da jabý kerek.
«Munda aiyppul salý úshin kelgen joqpyz. Ol bizdiń quzyrymyzǵa da kirmeidi. Ereje buzý máselesin aýdandyq monitoring toptary qarastyrady. Al biz nysandardyń jańa jaǵdaida jumys isteýge qanshalyqty daiyn ekenin kórgimiz keledi. Bul eń aldymen ózimiz úshin – adam densaýlyǵy úshin qajet. Nur-Sultan qalasy «qyzyl aimaqqa» endi, koronavirýs juqtyrǵandar kóbeidi, osyǵan bailanysty shekteýler qoiyldy. Eger qaladaǵy sanitarlyq-epidemiologiialyq jaǵdai jaqsarsa, nysandar burynǵy jumys kestesine oralady. Al eger jaǵdai nasharlasa, odan ári ne isteý qajettigi qaralady», - dedi Rýslan Ydyrysov.
Eske sala ketsek, 15 qańtarda Nur-Sultan qalasyndaǵy shekteý jáne karantin sharalary týraly qaýly jańartyldy.
