Foto: primeminister.kz
QR Májilisiniń jalpy otyrysynan keiin ótken brifing barysynda Qazaqstan Premer-Ministri Álihan Smaiylov «ArselorMittal Temirtaý» AQ-nyń odan ári qyzmeti jónindegi josparlaryn aitty, dep habarlaidy "Ult aqparat" primeminister.kz portalyna silteme jasap.
Úkimet basshysy qazirgi ýaqytta kásiporynda kenshilerdiń ólimine bailanysy tergeý júrgizilip jatqanyn eske saldy.
«Ótken jyldyń qarasha aiynda qaiǵyly oqiǵa saldarynan 4 shahter qaza tapqan bolatyn. Bul jaǵdai boiynsha tergeý aiaqtaldy, jaýapkerler qazir materialdarmen tanysyp jatyr. Jaqyn arada olar sotqa jiberiledi. Tamyz aiynda da qaiǵyly oqiǵa oryn alyp, taǵy 5 shahter qaza tapty. Ol boiynsha tergeý júrip jatyr, áli aiaqtalǵan joq. Sońǵy fakti boiynsha jan-jaqty tergeý júrgizilip, kináli adamdardyń barlyǵy jaýapqa tartylady», — dedi Álihan Smaiylov.
Onyń sózinshe, Úkimettiń jýyq aradaǵy mindeti – bul kompaniianyń Qazaqstan Respýblikasyna qaitarylýyn qamtamasyz etý.
«Kásiporyndaǵy jalaqy men jumys oryndarynyń saqtalýy, barlyq áleýmettik mindettemeniń, onyń ishinde kenshiler qaza bolǵannan keiin týyndaǵan mindettemelerdiń oryndalýyn qamtamasyz etý. Olardyń tolyq oryndalýyn qadaǵalaityn bolamyz», — dedi Premer-Ministr.
Úkimet basshysy kompaniiany Qazaqstan Respýblikasyna qaitarý týraly aldyn ala mámilege sáikes, onyń egjei-tegjeiin jariia etýge bolmaitynyn aitty.
«Ol týraly mámile aiaqtalǵannan keiin, bir aidyń ishinde habarlanady. 30 qarashaǵa deiin qaitarýdyń barlyq zańdy rásimin aiaqtaýymyz kerek», — dedi Álihan Smaiylov.
Qorytyndylai kele Premer-Ministr memlekettiń «ArselorMittal Temirtaý» AQ-nyń menshik iesi bolý jáne oǵan biýdjet qarajatyn bólý jospary joq ekenin atap ótti.
«Biz aldaǵy 3 jylda keminde $3 mlrd investitsiialaýǵa daiyn jeke investordy tartýymyz kerek. Onyń shamamen $1,3 mlrd-yn birden quiý qajet, óitkeni kásiporyndaǵy qazirgi jaǵdai ónerkásiptik qaýipsizdik pen jabdyqty jańǵyrtý máselelerin tez arada sheshýdi talap etedi. Bul qazaqstandyq investor bolady dep josparlap otyrmyz», — dep túiindedi ol.
