Saiasattaný, áleýmettaný men filosofiia, tarih, psihologiia, pedagogika, ekonomika, mádeniettaný jáne filologiia ǵylymdary boiynsha azamattarǵa zamanaýi bilim berýge qajetti jaǵdai jasaý úshin Elbasy Nursultan Nazarbaev «Bolashaqqa baǵdar: Rýhani jańǵyrý» maqalasynda arnaiy tapsyrma berdi. Osy tapsyrmany oryndaý maqsatynda 2017 jyly «Jańa gýmanitarlyq bilim. Qazaq tilindegi 100 jańa oqýlyq» jobasy qolǵa alyndy. Ulttyq aýdarma biýrosy Elbasy bastamasyn júzege asyrý úshin qarqyndy jumys istep keledi. Bastapqydy aýdarma biýrosy álemdik deńgeidegi on segiz kitaptyń qazaqshaǵa aýdarylǵan nusqasyn usyndy. Bul týraly «Ult» portaly jazady.
2020 jyldyń 30 qańtaryndaǵy málimet boiynsha, tańdap alynǵan júz kitaptyń 47 oqýlyǵy aýdarylyp shyqty. Resmi aqparatqa súiensek, on myń danamen shyqqan kitaptar Qazaqstannyń 132 oqý ordasyna joldandy. Aita keteiik, qazaq tiline aýdarylǵan kitaptardyń negizgi túpnusqasy orys, aǵylshyn, frantsýz tilinde jaryqqa shyqqan.
Elbasy bastamasymen kóterilgen 100 jańa kitapty aýdarý jobasy – gýmanitarlyq baǵyttaǵy ǵylymi eńbekterdi qazaq tildi oqyrmanǵa jetkizý. Sol arqyly gýmanitarlyq bilim men ǵylymnyń mazmunyn jańartýdy kózdeidi. Eń birinshi kezeńde 18 kitap basylyp shyqsa, ekinshi kezeńde 30 kitap aýdaryldy.
«Jańa oqýlyqtar – ekskliýzivti gýmanitarlyq kitaphana. Ol barlyq adam úshin úsh formatta qoljetimdi bolady: qarapaiym qaǵaz kitap túrinde, elektrondy onlain nusqa jáne úzdik dáriskerlerdiń ashyq dáristeriniń beine kitaphanasy formatynda bolady. Shetelde turatyn bizdiń jastarymyz da oǵan kitaptar latyn qarpinde basylyp shyqqan sátte qol jetkize alatyn bolady», - dedi Elbasy alǵash ret 18 aýdarma kitap basylyp shyqqan kezde.
Qazirdiń ózinde belgilengen kitaptardyń jartysynan astamy basylyp, aýdarylyp shyqty. Alaida bastapqyda aýdarýǵa 800-ge tarta kitaptyń usynylǵanyn, olardyń ishinen kem degende buǵan deiin úsh basylymda basylyp shyqqany jáne keiingi úsh jylda jaryq kórýi eskerildi. Al ony Qazaqstannyń bilim jáne ǵylym ministrligi janynan qurylǵan arnaiy komissiia irikteidi. Ol kitaptar álemniń 100 úzdik ýniversitetiniń oqý baǵdarlamasynda bar bolýy kerek. Mazmunyna keler bolsaq, bar kitaptyń mazmuny beitarap formatta berilgeni jón.
Úsh jyl ishinde túrli ǵylym salasyndaǵy kitaptar aýdaryldy. Keiingi 2019-2020 jyldary jobanyń úshinshi kezeńinde teatr men kino óneri týraly kitaptar, stsenarii jazýdyń qyr-syry, bilim berý teoriiasy jáne pedagogikaǵa qatysty kitaptar qazaqsha shyqty. Etika men estetika, ziiatkerlik menshik quqyǵy, aǵylshyn quqyǵy týraly da kitaptar aýdaryldy. Ekonomikaǵa qatysty mikro jáne makroekonomika, qarajat pen statistikaǵa qatysty kitaptar da jobanyń osy kezeńinde basylǵan bolatyn. Sonymen qatar osy kezeńde qamtylǵan baǵyt ishinde azamattyq protsess, álemdik mýzyka tarihy, áleýmettik zertteý ádisteri sekildi taqyryptar bar. Aita keteiik, bul kitaptardy aýdarýǵa elimizdegi aldyńǵy qatarly oqý oryndarynyń oqytýshylary, bilikti, tájiribeli aýdarmashylar men redaktorlar jumys istep jatyr. Bul jobaǵa tartylǵan aýdarmashylar eki tildi erkin ári jetik meńgergen bolýy shart. Al redaktorlarǵa keler bolsaq, elimizdiń belgili ǵalymdary men oqý oryndarynyń ustazdary, baspagerler talmai eńbek etip jatyr. Jalpy Ulttyq aýdarma biýrosyndaǵy atalǵan jobaǵa úsh júzge tarta maman qyzmet etýde.
Jobanyń tórtinshi kezeńinde 23 kitap aýdarylady. Ol protsess 2020 jyldyń sońyna deiin jalǵasady dep josparlanyp otyr. Tórtinshi kezeńdegi tizimge shyǵystyń filosofiiasy, áleýmettik jumys pen áleýmettik saiasat, tarih pen etnografiia, demografiia, kelissóz júrgizý taqyryptaryndaǵy kitaptar aýdarylady. Shyǵys filosofiiasynyń aiasynda arab, úndi, qytai, japon mádenieti jáne Islam filosofiiasy taqyrybyndaǵy eńbekter qazaqshalanady.
Aita keteiik, bilim salasyndaǵy ashyqtyq aiasynda kez kelgen oqyrman sait arqyly kitaptyń mazmuny men aýdarmasyna qatysty pikirin aityp, keri bailanys jasai alady. Sonymen qatar aýdarylǵan oqýlyqtardyń elektrondy nusqasy da oqyrmanǵa jol tartty. Ár til úshin jańa bir sózdiktiń basylyp shyǵýy úlken jetistik. Osy oraida aǵylshyn tilindegi «Oksford áleýmettik ǵylymdar sózdigi», «Oksford ekonomika sózdigi» jaryq kórdi. Sonymen qatar 2020 jyly Oksford baspasymen birlesip, kólemi myń betten asatyn Oxford Kazakh Dictionary qazaqsha-aǵylshynsha jáne aǵylshynsha-qazaqsha sózdikterdin shyǵarý josparlanyp otyr.
