Qazaq tili álipbiin latyn grafikasyna 2025 jylǵa deiin kezeń-kezeńmen kóshirý josparyna sáikes jańa mindetter júkteldi. Bul týraly Parlament Senatynda QR Mádeniet jáne sport ministri Arystanbek Muhamediuly málim etti, dep habarlaidy QazAqparat.
«Elbasy Nursultan Ábishuly Nazarbaevtyń «Qazaq tili álipbiin kirillitsadan latyn grafikasyna kóshirý týraly» Jarlyǵyn iske asyrý boiynsha Ministrlik birqatar jumystar atqarýda. Atap aitqanda, Memleket basshysynyń atalǵan Jarlyǵy negizinde Qazaq álipbiin latyn grafikasyna kóshirý jónindegi ulttyq komissiia jáne onyń janyndaǵy jumys toptarynyń josparlary bekitildi. Osy baǵytta birqatar sharalar qolǵa alyndy», - dep toqtaldy A. Muhamediuly.
Ministrlik qazirgi kezeńde jańa álipbige kóshý barysynda atqarylyp jatqan jumystardy baiandaý, túsindirý, ádistemelik kómekter kórsetý maqsatynda tiisti ǵylymi sharalar júrgizdi. Oǵan Ulttyq komissiia jáne jumys toptary músheleri, Parlament depýtattary,elimizdiń jetekshi lingvist ǵalymdary qatysty.
«Jańa álipbidiń emle erejeleri keń túrde talqylanyp, onyń tujyrymdamasy maquldandy. Osy tujyrymdamanyń negizinde kópshilik qoldanysyna enetin emle erejeler taiaý ýaqytta daiyn bolady. Bul baǵytta ministrlik janynan Shaisultan Shaiahmetov atyndaǵy «Til-Qazyna» ulttyq-ǵylymi tájirbielik ortalyǵy quryldy. Ortalyqtyń qyzmet aiasy keńeiip, qazaq tili álipbiin latyn grafikasyna 2025 jylǵa deiin kezeń-kezeńmen kóshirý jónindegi is-sharalar josparyna sáikes jańa mindetter júkteldi», - dedi ministr.
Bul rette innovatsiialyq IT tehnologiialardy qoldana otyryp, balalar men eresekterge arnalǵan onlain-qosymshalar, elektrondyq nusqadaǵy oqý kýrstaryn ázirleý; latyn grafikasyna mátindik qaita kodtaýshyǵa arnalǵan konverter baǵdarlamasyn jáne IT qosymshasyn ázirleý; qazaq álipbiin latyn grafikasyna aýystyrýdyń negizgi aspektileri týraly azamattardy aqparattandyrý deńgeiin anyqtaý boiynsha áleýmettanýshylyq zertteýler júrgizý; qazaq álipbiin latyn grafikasyna kóshirý boiynsha túsindirý jumystaryn júrgizý úshin beine bloktar ázirleý eskerilgen.
Sonymen birge, A. Muhamediuly ortalyqtyń ǵylymi áleýeti artyp kele jatqanyn atap ótti. Búgingi tańda munda ǵalymdar men bilikti mamandar tartyldy. Qazir Ulttyq ǵylym akademiiasynyń akademigi, 2 ǵylym doktory, 6 ǵylym kandidaty jumys jasaýda.
