«Jańa adamdar» jastar qozǵalysy lýdomaniiaǵa qarsy aktsiia bastady dep habarlaidy "Ult aqparat" Zhanaadamdarnews telegram arnasyna silteme jasap.
Qazaqstandyqtar qumar oiyndarǵa óz densaýlyǵyna qaraǵanda eki ese kóp qarjy jumsaidy eken. Nebári sońǵy úsh aidyń ishinde Qazaqstan azamattary júz milliardqa jýyq teńgege utylyp qalǵan. Sońǵy birneshe jylda elimizde qumar oiyndar naryǵy úsh esege deiin ósip, qoǵamnyń basty áleýmettik aýrýlarynyń biri lýdomaniia keń etek jaiyp jatyr. Lýdomaniia otbasylardy buzady, halyqty permanentti ekonomikalyq jáne tulǵalyq kriziske ushyratyp, basqa da táýeldilik túrlerine, atap aitqanda, maskúnemdik, esirtkige táýeldilik, selfharmany qozdyryp, ózin-ózi óltirýge deiin alyp keledi.
Adamdar ońai jolmen baiyp ketetinine sengisi keledi. Sondaǵysy, «sátti túsedi» degen bir oiyn. Býkmekerler halyqtyń osy qalaýyn óz maqsatyna paidalanýǵa tyrysady. Iaǵni, tez utys jáne sansyz aqsha ýádelerimen ózine tartady, utys tigýdiń ziiandaryn aitpai, tek áleýetti artyqshylyqtaryn alǵa tartady. Bul — ádiletsizdik. Jai ǵana aldaý.
Jańa adamdardyń «Stavki na stop» jobasy Astanadaǵy tanymal býkmeker keńsesiniń jarnamalyq bannerin qumar oiyndarynyń barlyq kórinisin ashatyn ózderiniń «shyndyq bannerimen» jaýyp tastady. Statistika boiynsha, qumar oiynǵa táýeldi adamdardyń 40% otbasynan airylsa, 20% túrli qylmystar jasaýǵa barady. Ádettegi qumar oiynshynyń orta eseppen qaryzy 10 million teńgeni quraidy. Býkmeker keńseleriniń shynaiy jarnamasy osylai bolý kerek.
"Qazir elimizde býkmekerlik keńselerdiń jarnamasyn shekteý týraly zań talqylanyp jatqanyn bilemiz. Osy aldaýmen bar kúshimizben kúresip, adamdardy bul qaýipti táýeldilikten alyp shyǵý mańyzdy. Bir nárseni túsinýimiz kerek: býkmekerlik keńselerdiń qýlyǵyna túsip qalmaý úshin tez ári ońai jolmen keletin aqshaǵa senýdi toqtatý kerek. Bailyqqa jetýdiń ońai joly joq. Bizdiń ózindik shyǵarmashylyǵymyz, eńbeksúigishtik pen pragmatizm — mine naǵyz bailyqqa jetý joldary. Shyndyqqa týra qarai bileiik. Býkmekerlerdiń quryǵyna túspeýdiń jalǵyz joly — ońai sheshimderge senýdi toqtatý", - dedi Ǵarifollaev Meiirjan, Jańa adamdar belsendisi.
.
