Tanymal ánshi Tóreǵali Tóreáliniń mýzykalyq prodiýseri Jan Muqanov ánshimen jumys isteýden nege bas tartqanyn aitty, - dep habarlaidy Tengrinews.kz tilshisi.
Bul týraly ol Telegram jelisindegi arnasynda jazdy. Onyń aitýynsha, ánshiniń ákesiniń oǵan bylapyt sóz aitqan kezderi de bolypty.
"Ishki máseleni jurtqa jaimaimyz dep kelisken edik. Biraq sońǵy ýaqytta aitylyp jatqan qaýesetter men tanys adamdardan estigen áńgimeler onyń (Tóreǵali Tóreáli - Avt.) meni, óz "baýyryn" jamandap, osy kelisimdi saqtamaǵanyn bildim. Men úndemegen saiyn onyń aitqany shyndyqtai kórinip jatyr. Biraq onyki durys emes!", - deidi ol.
Sonymen qatar, Jan Muqanov ánshimen 2015 jyly "Jigitter" tobynyń kontsertinde tanysqanyn aitady. Sol kezde ánshi óte qarapaiym, qaiyrymdy, ar-uiaty bar, mádenietti jigit bolatyn. Prodiýser Respýblika Saraiynda tuńǵysh jeke kontsertin ótkizý týraly usynys alyp, kóp oilanbastan kelisim beripti.
"Kontsertti "Uly dala balasy" dep ataýdy usynǵanymda ákesi jurt durys túsinbei qalar dep qarsy shyqty. Men kóndirdim, sodan beri bul sóz oǵan qatysty aitylatyn boldy. Mine, jeke kontserti tamasha ótti. Keiin mega jobalar, kontsertter ótti, stilimen, imidjimen jumys istei bastadyq, ony damytý boiynsha kóptegen is atqaryldy. Shyn máninde osy ártispen maqtanatynmyn. Eki jyl ishinde onyń qarapaiym, tanylmaǵan ánshiniń eń tanymal adamǵa ainalǵanyn atap óteiin. Gonorary da ósti. Bastapqyda 200-500 dollar bolsa, bir jyl ishinde bul soma 8 myń dollarǵa jetti", - dep jazdy Jan Muqanov.
Onyń aitýynsha, 2018 jylǵa túrli telejoba josparlanǵan, tipti shetelde de óner kórsetý oiy bolypty. "Uly dala balasy. Álem" realiti shoýy 7 elde ótip, osy elderdiń eń tanymal ánshilerimen dýet oryndaý da alǵan qoiylǵan maqsattardyń biri bolypty.
Munymen qatar, Muqanov Tórǵalidiń barlyq bes kontsertin óz qaltasynan qarajat shyǵaryp, ótkizgenin málimdeidi.
"Ákesiniń minezin bári biledi, osy jyldar boiy birge jumys istegen men artyǵyraq bilemin. Sondyqtan bastapqyda kontsert isterine ol aralaspaidy dep kelistik. Qonaq bolyp kelip, sol kúii ketip júrdi. Kontserttiń bes kúninde 15 myń bilet satýymyz qajet edi, amal ne, 3 500-dei ǵanasy ótti. Shyǵynǵa batqanymdy uqtym. Mende aqsha bolmady, qyrýar aqsha qajet bolyp, men Tóreǵaliden bolashaqqa 10 nemese 15 ret óner kórsetýinen túsken qarajatty suradym. Sóitip, jumsalǵan aqshany qaitarǵym keldi. Biraq "Joq, bul seniń problemań, Jan" degen jaýap estidim", - dep jazdy prodiýser.
Aitýynsha, Tóreǵali Tóreáli úilený toiynan keiin josparlanǵan Dýbaiǵa bara almai qalypty. Onda áieline arnap klip túsiriledi degen de kelisim bolǵan eken. "Al toi kezinde aqsham bolmai, ákesinen suradym. Ol maǵan bylapyt sóz aitty. Óz ákem de mundai jasamaǵan. (...) Esin jiyp, jasalǵan sharýany sońyna deiin jetkizedi dep úmittenemin! Kóp kúsh jumsaldy, júike tozdy, jumsalǵan aqsha men uiqysyz túnimiz kóp boldy. Esińdi ji, Tóreǵali! Bar qyzyq alda! Jasyń bar bolǵany 25-te", - deidi ol.
Eske salaiyq, 21 jeltoqsanda Tóreǵali Tóreáli Pavlodar qalasynda Estai atyndaǵy mádeniet saraiynda "Aihai-25" atty án keshin ótkizgen bolatyn. Kontsert kezinde kórermenderdiń biri ózin Qyzylordadan kelgenin aityp, ánshiden sýretke túse bermei, án aitýy kerektigin urysyp aitqan. Sahnada turǵan Tóreǵalidiń jaýaby qalyń jurtshylyqqa unamaǵan bolatyn. Kelesi kúni ánshi Instagram-da tikelei efirge shyǵyp, jazylýshylarynan keshirim suraǵan.
