Shetelden bilikti dárigerlerdi shaqyrtyp, naýqastarǵa kómek kórsetý máselesi pysyqtalyp jatyr. Bul týraly «Qazaqstan halqyna» qoǵamdyq qorynyń tóraǵasy Bolat Jámishev málim etti, dep habarlaidy QazAqparat.
«Meditsina jaǵynan bizge eki myńnan astam ótinim kelip tústi. Solardyń arasynda bionikalyq protezder týraly ótinimder de bar. Elimizde osyndai protezderdi shyǵaratyn 5-6 firma bar ekeni belgili. Osy oraida tiisti kómek berý máselesin pysyqtap jatyrmyz», - dedi Jámishev Ortalyq kommýnikatsiialar qyzmetinde.
Sonymen qatar ol biraz adam shetelde emdelýge qarajat suraǵanyn aitty.
«Elimizde 18 jyldan beri jumys istep júrgen «Juldyz-ai» qory bar. Olar osy ýaqyt aralyǵynda 800 operatsiiaǵa shetelden dáriger men hirýrg mamandardy shaqyrtqan. Biz shetelge artyq qarajat jumsamai, dárigerlerdi osynda aldyrtyp, operatsiialardy uiymdastyrý máselesin qarastyryp jatyrmyz. Bizge kúrdeli jaǵdaiǵa tap bolǵandar ótinim jazatyny belgili. Sondyqtan bul adamdardyń problemalaryn barynsha tiimdi sheshý jan-jaqty pysyqtaýdy talap etedi», - dedi qor basshysy.
