شەتەلدەن بٸلٸكتٸ دەرٸگەرلەردٸ شاقىرتىپ, ناۋقاستارعا كٶمەك كٶرسەتۋ مەسەلەسٸ پىسىقتالىپ جاتىر. بۇل تۋرالى «قازاقستان حالقىنا» قوعامدىق قورىنىڭ تٶراعاسى بولات جەمٸشەۆ مەلٸم ەتتٸ, دەپ حابارلايدى قازاقپارات.
«مەديتسينا جاعىنان بٸزگە ەكٸ مىڭنان استام ٶتٸنٸم كەلٸپ تٷستٸ. سولاردىڭ اراسىندا بيونيكالىق پروتەزدەر تۋرالى ٶتٸنٸمدەر دە بار. ەلٸمٸزدە وسىنداي پروتەزدەردٸ شىعاراتىن 5-6 فيرما بار ەكەنٸ بەلگٸلٸ. وسى ورايدا تيٸستٸ كٶمەك بەرۋ مەسەلەسٸن پىسىقتاپ جاتىرمىز», - دەدٸ جەمٸشەۆ ورتالىق كوممۋنيكاتسييالار قىزمەتٸندە.
سونىمەن قاتار ول بٸراز ادام شەتەلدە ەمدەلۋگە قاراجات سۇراعانىن ايتتى.
«ەلٸمٸزدە 18 جىلدان بەرٸ جۇمىس ٸستەپ جٷرگەن «جۇلدىز-اي» قورى بار. ولار وسى ۋاقىت ارالىعىندا 800 وپەراتسيياعا شەتەلدەن دەرٸگەر مەن حيرۋرگ مامانداردى شاقىرتقان. بٸز شەتەلگە ارتىق قاراجات جۇمساماي, دەرٸگەرلەردٸ وسىندا الدىرتىپ, وپەراتسييالاردى ۇيىمداستىرۋ مەسەلەسٸن قاراستىرىپ جاتىرمىز. بٸزگە كٷردەلٸ جاعدايعا تاپ بولعاندار ٶتٸنٸم جازاتىنى بەلگٸلٸ. سوندىقتان بۇل ادامداردىڭ پروبلەمالارىن بارىنشا تيٸمدٸ شەشۋ جان-جاقتى پىسىقتاۋدى تالاپ ەتەدٸ», - دەدٸ قور باسشىسى.
