Óńirloik kommýnikatsiialar qyzmetinde ótken baspasóz-máslihatynda Jambyl oblysynyń ákimi Berdibek Saparbaev oblys turǵyndaryn kezekti ret karantin kezinde otbasylyq jappai is-sharalardy ótkizbeýge jáne olarǵa qatyspaýǵa shaqyrdy, dep habarlaidy "Ult aqparat".
«Men oblys turǵyndaryna taǵy da eskertkim keledi. Qazir bári ózimizge bailanysty. Biz jaqyndarymyz ben ainalamyzdaǵylar jáne bizdiń kómegimiz ben qoldaýymyzǵa muqtaj jandar úshin jaýapty ekenimizdi umytpaýymyz kerek. Men jambyldyqtardy barlyq sanitarlyq jáne karantin sharalaryn qatań saqtaýǵa shaqyramyn. Qart adamdardan qajetsiz syrtqa shyqpaýyn suraimyn. Oblysta 300-den astam egde jastaǵy adam koronavirýspen aýyrǵan. Ókinishke orai, qart kisiler buqaralyq otbasylyq sharalarǵa, úilený toilaryna, betasharlarǵa, qudalyqtarǵa barýdy jalǵastyrýda. Osylaisha siz óz týystaryńyz ben jaqyndaryńyzdyń deńsaýlyǵyna qaýip tóndiresiz. Ondai bolsa balalaryńyz ben nemerelerińizge qandai úlgi kórsetesizder?» - dedi Saparbaev brifingide.
Aimaq basshysy azamattarǵa tek resmi aqparat kózderine senýdiń, jalǵan nemese naqty emes aqparattardy taratpaýdyń mańyzdylyǵyn basa aitty.
«Túrli arandatýshylyqqa boi aldyrmańyzdar. Kez kelgen aqparatty tiisti memlekettik organdarda tekserýge bolady. Eger árqaisymyz qazirgi jaǵdaidyń kúrdeliligin sezinip, túsinetin bolsaq, qabyldanǵan barlyq sharalar óz nátijesin beretin bolady. Ol úshin memleket, qoǵam, azamattar birlesip áreket etý qajet», - dep túiindedi ol.
Búgingi tańda oblysta koronavirýs infektsiiasynyń 1 866 jaǵdaiy tirkelgen. Onyń ishinde: 865 – simptomdyq naýqastar bolsa, 1 001-i simptomsyz. Indet juqtyrǵandardyń 305-i zeinetker, 475-i jumyssyz, 68-i júkti áiel, 121-i áskeri qyzmetshi, 100-ge jýyǵy balalar men mektep oqýshylary.
