Jambyldyq azamat koronavirýsty Qyrǵyz elinen juqtyryp kelgen. Bul týraly «Habar 24» telearnasynyń tikelei efirinen Jambyl oblystyq densaýlyq saqtaý basqarmasynyń basshysy Marat Jumanqulov aitty, dep habarlaidy "Ult aqparat".
«Jambyl oblysynda koronavirýs indetin juqtyrǵan bir azamat anyqtalyp otyr. Ol - Jambyl oblysy Shý aýdanynyń turǵyny. Ol Qyrǵyzstan Respýblikasynan oblysymyzǵa kelgen. 24 naýryz kúni oblystyq karantindik statsionarǵa jatqyzylyp, bekitilgen algoritmge sáikes synama alyndy. Synama qorytyndysy boiynsha oń nátije kórsetildi. Degenmen saraptamalaryn naqtylai túsý úshin Almaty qalasyndaǵy virýsologiialyq zerthanaǵa qosymsha jiberildi», - dedi basqarma basshysy.
Marat Jumanqulovtyń aitýynsha, indet juqtyrǵan patsientpen tyǵyz qarym-qatynasta bolǵan adamdar túgel anyqtaldy. Olardyń barlyǵy meditsinalyq baqylaýda, 13 adam statsionarlyq karantinge jatqyzyldy.
«Patsienttiń turǵylyqty jerine zalalsyzdandyrý jumysy júrgizildi. Belgilengen algoritm boiynsha sharalar júzege asyryldy. Búgingi tańda naýqastyń jaǵdaiy birqalypty. Densaýlyǵyna eshqandai shaǵym joq. Dene qyzýy kóterilmedi. Naýqas oblystyq juqpaly aýrýlar aýrýhanasynda jatyr. Mamandarymyzdyń baqylaýynda, bekitilgen emdeý hattamasyna sáikes em alýda», - dedi ol.
