Jambyl oblysynda azyq-túlik baǵalary basqa óńirlermen salystyrǵanda tómen, dep habarlaidy "Ult aqparat".
Máselen, oblystaǵy áleýmettik 4 taýar — nan, sút, piiaz, qant baǵasy respýblika boiynsha eń tómengi deńgeide. Taǵy 4 taýar kúnbaǵys maiy, sary mai, airan, qus eti tómengi úshtikte. Qalǵan taýarlar ortańǵy deńgeide qalyptasyp, baǵasy joǵary taýarlar tirkelmegen. Bul týraly óńirlik kommýnikatsiialar qyzmetinde ótken brifing barysynda oblystyq aýyl sharýashylyǵy basqarmasynyń basshysy Qairat Amanov aitty.
Ol aldaǵy ýaqytta baǵanyń birqalypty bolýyna turaqtandyrý qoryndaǵy taýarlardyń jetkilikti mólsheri áser etpek deidi. Máselen, qazir qorda 3-6 aiǵa jetkilikti azyq-túlik bar. Olardyń qatarynda 444 tonna qant, 173 myń dana jumyrtqa, 53 tonna qaraqumyq, 1500 tonna un, 181 tonna kúnbaǵys maiy bar. Budan ózge jalpy 11 ataýly taýarlardyń 3 382 tonna qory jinaqtalǵan.
Aimaqta aǵymdaǵy jyldyń basynan qor arqyly 1202 tonna taýarlar berilgen. Bul ótken jylmen salystyrǵanda 3,4 esege artyq. Byltyrǵy kólem 349 tonna bolatyn. Ótkerilgen taýarlardyń 300,3 tonnasy áleýmettik dúkenderge, 320 tonnasy aýdandar men iri saýda oryndaryna, 581 tonnasy nan baǵasyn turaqtandyrýǵa un kúiinde jiberilgen.
«Maýsym aralyq kezeńde kókónis baǵalaryn turaqtandyrý maqsatynda Túrkistan oblysynan 15 mamyrǵa deiin úsh jaqty jetkizý kelisimi negizinde qyryqqabat 55 teńgeden, oblystyń jergilikti óndirýshilerinen sábiz 100 teńgeden, piiaz 30 teńgeden, kartop 100 teńgeden iri 7 saýda jelilerine tikelei jetkizilýde. Bólshek saýdada qosylatyn ústeme aqyny 5-15 teńgeden asyrmaý jóninde kelisimder jasaldy. Nátijesinde, osy aptada qyryqqabat 3,2%, piiaz 2,7%, kartop 1,6% tómendedi»,-dedi Q. Amanov.
Turaqtandyrý tetikteriniń ekinshi jańadan iske qosylǵan baǵyty «ainalym shemasy». Bul boiynsha jyl basynda bólingen 632 mln. teńgege qosymsha 168 mln. teńge baǵyttalyp, jalpy 800 mln. teńgeni quraityn bolady. Aita ketý kerek, jyl basynan beri oblysta 31 aýyl sharýashylyǵy jármeńkeleri ótti. Onyń 12 oblystyq, 19 aýdandyq deńgeide ótkizilip, jalpy quny 157,5 mln. teńgeni quraityn, 691 tonna ónimder naryqtan 8-20% tómen baǵadan satylǵan.
