.jpg)
Foto: ashyq derekkóz
Jambyl oblysyndaǵy jaiylymdardy typ-tipyl qylǵan esekter endi ashtan qyryla bastady, dep habarlaidy Ult.kz KTK-ǵa silteme jasap.
Qala irgesindegi Baizaq jáne Talas aýdanynyń turǵyndarynyń aitýynsha, ainala óleksege tolǵan. Tipti birneshe aýdan halqy sý ishetin Talas ózeni de esektiń molasyna ainaldy dep dabyl qaǵýda.
Jaiylymy tarylyp jylarman hálge túsken aýyl turǵyndary eki jyldan beri «esekke esemiz ketti» deidi. Óitkeni jylqylar taqyr jerge qysta tebindei almai qalǵan. Maldyń qysqy shóbin úige jinaýǵa kóshken jurt bilikten kómek surap otyr.
«Jaiylymda jýsannyń shógirinen basqa eshteńe qalǵan joq. Aýyldyń maly aryq. Qiyn jaǵdai, jem-shóp te qymbat. Jalpy sharýashylyqqa úlken nuqsan kelip jatyr. Talas ózeni jaǵalaýyn qý taqyrǵa ainaldyrǵan sansyz esek endi orman sharýashylyǵynyń jerine aýyz sala bastaǵan. Biz turǵan jer aýyl malynyń qysqy azyǵyn daiyndaityn shabyndyq jeri bolatyn. Qazir bul mańda esektiń tezeginen aiaq alyp júre almaisyń», - deidi Qazturǵan Bolysbaev.
Esek jailaǵan birneshe aýyldyń turǵyndary bilgisiz sebepten ár jerde ólip jatqan janýarlar «aýrý tarata ma» dep qorqyp otyr. Al osy ózennen maly sý iship otyrǵan Talas aýdanynyń turǵyndary tirshilik nárin lastaýǵa jol bergender jaýapqa tartylsyn deidi.
«Malynyń bári syrtta jatyr, qoranyń ishinde esek joq. Sol esekter mynaý tómengi Bostandyq savhozyna deiin, bizge deiin jaiylyp kelip jatyr. Qysta bizdiń malymyz ne jeidi? Qý taqyrdan malymyzdy qyryp almaimyz ba?», - dep ashyndy Jańabai Esimov.
Aýdan ákimi esek baǵýǵa esi ketken kásipkerge sóz ótpeitinin aityp nalydy. Ol eki jyldan beri esekti «elsiz mekenge áketemin» degen ýádisin sol kúii oryndamaǵan.
«Bizde báribir senim joq. Ár habarlasqan saiyn 20 kúnde alyp ketemin, 30 kúnde alyp ketemin deidi. Biraq alyp ketpeidi. Quzyrly organǵa da, inspektsiiaǵa da, veterinariia qyzmetine de berdik, negizgi quzyret solarda», - deidi Baizaq aýdanynyń ákimi Oljas Baqqaraev.
Al osy salaǵa jaýapty oblys ákiminiń orynbasary esekti alyp ketý úshin ministrlikten kómek surap otyrǵanyn aitady. Qazir muń bolǵan máseleni sheshý baǵytynda Qytaimen kelissóz júrip jatqan kórinedi.
«Biz byltyrdan beri aýyl sharýashylyǵy minstirligine jasyl dáliz ashyp berý ruqsatyn kútip otyrmyz. Iaǵni olar Qytai tarapymen kelisedi. Kelissózder júrgizilip jatyr. Qytaimen kelisý ońai emes. Qazir chiptaldy, bazada tur. Qytai tarapy jasyl dálizdi ashqan kezde ol esekterdiń bárin áketý týraly talap qoiyp otyrmyz», - dep túsindirdi Jambyl oblysy ákiminiń orynbasary Tamabek Ábilhaiyr.
Aýyl turǵyndary aýmaǵy at shaptyrym jerdi jalǵa alyp, esekterin qaraýsyz jibergen kásipkerge eshqandai shekteý qoia almai otyrǵan ákimdikke ókpeli. Olar sharýashylyqqa júk kólikterimen áli de esekter alyp kelip jatqanyn aityp otyr. Al bul salaǵa jaýapty ákimdik ókilderi jasyl dálizge ruqsat alýdan basqa amal joq deidi.
