Elbasy óziniń joldaýynda: «Jastardyń barlyq sanattaryn qoldaý boiynsha sharalar keshenin qamtityn áleýmettik liftilerdiń keń platformasyn jasaý qajet», – degen edi. Sonymen qatar kelesi jyldy Jastar jyly dep jariialaǵan bolatyn. Jambyl oblysynyń basty sharalardyń biri – balalar ómiriniń sapasyn jaqsartý jáne balalardyń quqyqtary men zańdy múddelerin qorǵaý. Ásirese, Balalar úiinde tárbielenip jatqan balalarǵa kóp kóńil bólinip júr.
Oblysta 0-18 jas aralyǵyndaǵy 419 965 bala bar. Olardyń 1448-i jetim jáne ata-anasynyń qamqorlyǵynsyz qalǵan balalar. Oblysta 2015-2018 jyldar aralyǵynda 17 otbasylyq úlgidegi balalar úii ashylypty. Onda 67 bala bar. Al 2 qabyldaýshy otbasynda 9 bala tárbielenip jatyr. Biyl 1069 bala qamqorlyqqa alynýǵa berilgen.
Jambyl oblystyq bilim basqarmasy basshysynyń orynbasary Talǵat Jamalovtyń aitýynsha, biyl balalar úiinen 81 bala asyrap alynǵan.
– Onyń ekeýin erli-zaiyptylar asyrap alsa, 30-y patronatqa berildi, 25-i qamqorlyqqa alyndy. Al jeteýi otbasy úlgisindegi balalar úiine bardy. 17 bala týǵan otbasylaryna berildi, – deidi Talǵat Jamalov.
Óńirdegi Q.Sarymoldaev atyndaǵy №1 balalar úiiniń tárbielenýshileri sońǵy úsh jylda 156 baladan 83 balaǵa azaiǵan. Sol sebepti atalǵan balalar úii men Kámeletke tolmaǵandardy beiimdeý ortalyǵy biriktirildi. Qazir Ómirlik qiyn jaǵdaidaǵy balalardy qoldaý ortalyǵy bolyp qurylǵan.
Balalar men jasóspirimderge arnalǵan mamandandyrylǵan mektepter de bar. Onda 11-18 jas aralyǵyndaǵy jasóspirimder tárbielenedi. Qazirgi kezde mamandandyrylǵan mektepterde 23 bala oqidy. Balalardyń jeke qabiletin damytý maqsatynda bilim berý mekemelerinde túrli úiirmeler jumys isteidi. Oqýshylar sport klýbtaryna, «Art Studio» men «Ritm» mýzykalyq stýdiiasynda qabiletin shyńdaidy. Sonymen qatar josparǵa sáikes, inkliýzivti bilim berý júiesin damytý jumystary júrip jatyr.
Oblystaǵy balalar úileri túlekterin biýdjettik negizde arnaýly jáne joǵary oqý oryndaryna túsiredi.
Talǵat Jamalovtyń aitýynsha, biyl balalar úilerin 21 túlek bitirip shyqqan. Beseýi Almaty qalasyna, on altysy Taraz qalasyndaǵy kolledjderge oqýǵa túsken.
Sońǵy úsh jylda Memlekettik turǵyn úi qorynan kezekte turǵan 300 balaǵa páter berilipti. Al 2018-2019 oqý jylynda 7911 densaýlyǵy boiynsha múmkindigi shekteýli balanyń 6286-sy oqýǵa túsken.
Sonymen qatar Bilim jáne ǵylym ministrligi respýblikada «Dúniejúzilik balalar kúnine» arnalǵan «Balanyń quqyqtary – adam quqyqtary» atty onkúndigin ótkizip jatyr. Sharaǵa sáikes, bilim berý uiymdary quqyqtyq bilim kúnderin, balalar men jastar qoǵamdyq birlestik basshylarynyń kezdesýlerin, qaiyrymdylyq aktsiialaryn, memlekettik jáne qoǵamdyq uiymdardyń basshylarymen, máslihat depýtattarymen kezdesýlerdi uiymdastyryp jatyr. Onkúndiktiń maqsaty – balalarǵa BUU Konventsiiasynyń negizgi erejesi negizinde óz mindetterin zańdyq talaptardy buzbai oryndaýǵa úiretý. Bala quqyqtary týraly konventsiiany 1989 jylǵy 20 qarashada BUU Bas Assambleiasy qabyldaǵan bolatyn.
Aita keteiik, balalardyń quqyǵyn qorǵaýdy baqylaý oblystyq Bilim basqarmasynyń jumysyna kiredi.
