Qazaqstan Prezidenti Qasym-Jomart Toqaev Jambyl oblysynyń jurtshylyǵymen kezdesti, dep habarlaidy "Ult aqparat" Aqordaǵa silteme jasap.
Jiynǵa óńirdiń ardagerleri, ziialy qaýym, azamattyq qoǵam jáne jastar ókilderi qatysty.
Qazaqstan Prezidenti Jambyl oblysynyń ekonomikalyq múmkindikterin atap ótip, túiini tarqatylmaǵan birqatar máselege nazar aýdardy.
– Oblystaǵy ortasha jalaqy mólsheri – 112 myń teńge. Bul – eldegi eń tómen kórsetkishtiń biri. 1 maýsymnan bastap tabysy tómen biýdjettik sala qyzmetkerleriniń jalaqysy ósti. Óńir kásiporyndary bul bastamadan shet qalmaýy tiis. Barlyq deńgeidegi ákimderdiń basty mindeti jańa jumys oryndaryn ashyp, halyqty qyzmetpen qamtý ekenin eskertemin. Jumys oryndaryn ashýda biznestiń róli joǵary. Sondyqtan, jergilikti kásipkerlerdi qoldaýdy jalǵastyrý qajet, – dedi Memleket basshysy.
Qasym-Jomart Toqaev ónerkásiptiń múmkindigin tolyq paidalanyp, indýstriialandyrý jobalaryn iske asyrýda zamanaýi tehnologiialyq óndiriske basa mán berý kerektigine toqtaldy.
– Óńdeý ónerkásibine, ásirese, himiia klasterine iri investorlardy tartý qajet. Úkimet pen ákimdikke osy máseleni naqtylaýdy tapsyramyn. Bul – ekonomikanyń ornyqty damýyna yqpal etedi, eńbek ónimdiligin arttyrady. Óńirdegi óndiristiń damý kózi «Taraz» himiialyq parki» arnaiy ekonomikalyq aimaǵy bolýy qajet, – dedi Qazaqstan Prezidenti.
Memleket basshysy óńirdiń aýyl sharýashylyǵy salasyndaǵy eńbek ónimdiliginiń tómen ekenin aitty.
– Jergilikti ákimdik agrosektor salasynyń mamandarymen tyǵyz jumys isteýi qajet. Oblysta qant qyzylshasy, jemis jáne kókónis daqyldarynyń kólemin kóbeitýge múmkindik bar. Úkimet kelesi jyldan bastap shetelden ákelinetin shiki quraq qantyna importtyq baj salyǵyn salý týraly sheshim qabyldady. Osyǵan orai, oblys ákimine qant qyzylshasy men jemis-kókónis daqyldarynyń egis kólemin ulǵaityp, óńdeý kásiporyndarynyń qýatyn arttyrýdy tapsyramyn, – dedi Qasym-Jomart Toqaev.
Qazaqstan Prezidenti óńirde týristerdi qyzyqtyratyn tarihi oryndar barshylyq ekenin atap ótip, týrizmdi damytý qajettigin aitty.
– Aimaqtyń týristik áleýetin arttyryp, investitsiia tartý úshin júieli sharalar qabyldaý qajet. Bul baǵytta sheteldik ozyq tájiribelerdi eskergen jón. Úkimet týrizmdi damytýǵa arnalǵan memlekettik baǵdarlama daiyndaýda. Jambyl oblysy tarihi kórnekti oryndarǵa óte bai. Óńirdegi Aisha Bibi jáne Qarahan keseneleri, Jaisań kieli jeri, Kóksai shatqaly jáne basqa da tarihi oryndar – halqymyz úshin ortaq mádeni qundylyqtar. Úkimet pen ákimdik bul salany birlese damytýǵa kúsh salýy kerek. Oǵan oblystyń resýrstary jetkilikti, – dedi Memleket basshysy.
Aimaqtar arasyndaǵy alshaqtyqty azaitý qajettigin aitqan Qazaqstan Prezidenti Jambyl oblysyndaǵy shaǵyn qalalardy damytý týraly oiyn ortaǵa saldy.
– Mono jáne shaǵyn qalalar – óz aldyna bólek másele. Jańatas, Qarataý sekildi shaǵyn qalalardyń áleýmettik, kólik jáne injenerlik infraqurylymyn damytamyz. Bul sharalar, eń aldymen, halyqtyń ómir súrý sapasyn arttyrý úshin jasalyp otyr, – dedi Qasym-Jomart Toqaev.
Memleket basshysy sybailas jemqorlyq máselesine de toqtaldy.
– Jemqorlyqty túbegeili joiǵansha kúresemiz. Ákimderge erekshe jaýapkershilik júkteledi. El ekonomikasynyń damýy jáne halyqtyń ál-aýqatynyń artýy osyǵan tikelei bailanysty. Jemqorlyqpen kúres – meniń Prezident retinde negizgi maqsattarymnyń biri. Bul iske aimaq ókilderi belsene aralasýy kerek, – dedi Qazaqstan Prezidenti.
Qasym-Jomart Toqaev aýdandyq, aýyldyq eldi mekenderdegi joldardy jaqsartýdy, bilim berý nysandaryn kóptep salýdy, sol arqyly úsh aýysymdy jáne apatty jaǵdaidaǵy mektepter máselesin retteýdi tapsyrdy. Sonymen qatar, Memleket basshysy jastarǵa árqashan qoldaý kórsetiletinin jáne bilikti mamandardyń shyǵarmashylyqta, qyzmettik satyda ósýi úshin kedergi bolmaýy kerektigin aitty.
– Ákimdikterdiń janyndaǵy Jastar keńesi olardyń qyzmet babynda ósýine qajetti baspaldaq bolýy tiis. Biz memlekettik qyzmette ǵana emes, bilim men ǵylym, mádeniet pen sport, biznes jáne basqa da salalarda daryndardyń dara shyǵýyn qoldaimyz. «Jas kásipker» baǵdarlamasy aiasynda jastardyń biznes bastamalary men startaptary qoldaý tabady, – dedi Qazaqstan Prezidenti.
Sonymen qatar, quqyq qorǵaý organdarynyń jumysyn kúsheitý qajettigin eskertip, óńirdegi mal urlyǵy men esirtki saýdasyna tosqaýyl qoiý kerektigin atap ótti.
– Adal eńbek etip, kúnin kórip otyrǵan malshylardy qorǵaýymyz qajet. Zańdy qataityp, qylmyskerlerdi sybailastarymen qosyp, qatań jazalaý kerek. Sondyqtan, ákimdikter men jergilikti politsiia barymtaǵa qarsy shuǵyl sharalar qabyldaýy tiis. Qylmystyq kodekske tiisti ózgertýler engizý qajet. Esirtki qylmysynyń ýshyǵýy – búkil qoǵamdy alańdatqan ózekti máseleniń biri. Ókinishke qarai, qazirgi ozyq tehnologiia damyǵan zamanda «esirtki biznesiniń» dáýreni júrip tur. Bul, eń aldymen, jastardyń sanasyn jáne densaýlyǵyn ýlaityn kesel. Muny toqtatý qajet! – dedi Memleket basshysy.
Qasym-Jomart Toqaev kezdesý sońynda dáriger, muǵalim jáne kásipkerlerdi Alǵys hattarmen marapattady. Marapattalǵandar: Moiynqum aýdandyq aýrýhananyń bas dárigeri J.Aitishev, «Knaýf-gips Taraz» JShS direktory M.Beknazarov, «Jasau Taraz» jeke kásipkerligi basshysy A.Beksultanova, oblystyq daryndy balalarǵa arnalǵan mektep-internattyń qazaq tili men ádebieti pániniń muǵalimi P.Ozyqbaeva jáne «Agrospetsstroi» JShS bas direktory M.Rahymberdiev.
