Foto: TJM
Keshe keshke Moiynqum aýdanynda joǵalyp ketken er adam tabyldy, dep habarlaidy TJM baspasóz qyzmeti.
Tótenshe jaǵdailar qyzmetiniń málimetinshe, 1964 jyly týǵan azamat 31 jeltoqsan kúni Moiynqum aýylyna qarai jaiaý shyqqannan keiin habarsyz ketken.
Izdestirý-qutqarý jumystary 11:00–de Moiynqum aýdanynda, Moiynqum aýylynan shamamen 90 shaqyrym qashyqtyqta ornalasqan sharýa qojalyǵy aýmaǵynda bastaldy.
Izdestirý jumystaryna TJM bólimsheleri, Politsiia departamenti jáne jergilikti atqarýshy organdar jumyldyryldy. Operatsiiaǵa jeke quram, arnaiy tehnika, kinologiialyq eseptoptar jáne ushqyshsyz ushý apparattary tartyldy.
– Qyzmetterdiń úilesimdi ári jedel áreketteriniń nátijesinde joǵalǵan azamat sharýa qojalyǵynan shamamen 50 shaqyrym qashyqtyqtaǵy dala aýmaǵynan tabyldy. Er adamnyń jaǵdaiy qanaǵattanarlyq, meditsinalyq kómek qajet bolǵan joq, – delingen habarlamada.
